Milli Məclisdə “Fransız Polineziyasının Dekolonizasiya Hüququ – Çağırışlar və Perspektivlər” mövzusuna həsr edilmiş konfrans keçirilib.
İnterpress.az xəbər verir ki, konfransda “Tavini Huiraatira” Partiyasının baş katibi Viktor Maamaatuaiahutapu və onun rəhbərlik etdiyi nümayəndə heyəti iştirak edib.
Milli Məclisin sədr müavini Əli Hüseynli bildirib ki, ölkəmiz Qoşulmama Hərəkatına sədrliyi dövründə daim neokolonializmə qarşı çıxıb:
“Xüsusilə də Manohilui dövlətindən və Polineziyanın hakim “Tavini” partiyasının nümayəndələri də neokolonializm prinsipləri ilə tanışdır. Müstəmləkə və post-kolonial dövrün cinayətlərinə görə hansısa dövlətin məsuliyyətə cəlb edilməsi üçün beynəlxalq hüququ aşmaq lazımdır. Bu gün manohilui xalqı demokratiya uğrunda müzakirə aparır”.
“Tavini Huiraatira” Partiyasının Baş katibi Viktor Maamaatuaiahutapu bildirib ki, bu gün ölkəsi və xalqı Fransanın siyasətinə görə təcrid olunduğunu bildirib:
“Biz bilirik ki, siz bizim problemlərimizi beynəlxalq ictimaiyyətə çatdıracaqsınız. Biz sizin yaşadıqlarımızı başa düşdüyünüzü bilirik. Biz minilliklər boyu yaşamış sivilizasiya olsaq da, siyasi baxımdan gənc ölkəyik. Bizim ədalətin öz yerini tapmasına ehtiyacımız var. Hesab edirik ki, Azərbaycanın da bu yolda ölkəmizin və xalqımızın yanında olması olduqca böyük əhəmiyyət daşıyır”.
Milli Məclisin Hüquq Siyasəti Komitəsinin üzvü, millət vəkili Nizami Səfərov isə bildirib ki, bu konfransda dekolonizasiyanın müxtəlif aspektləri müzakirə olunacaq.
Onun fikrincə, 1996-cı ildə Fransız Polineziyası BMT-nin müstəmləkə siyahısından çıxarılsa da, 2016-cı ildə yenidən siyahıya qaytarılıb:
“Dekolonizasiya prosesi hələ də dünyanın 17 ölkəsində yaşayan xalq üçün məntiqi sonluğa çatmayıb. BMT Baş Assambleyasının qətnamələrində Fransız Polineziyasının müstəqillik hüququ öz əksini tapıb. 2018-ci ildən sonra qəbul olunan bütün qətnamələrdə Bakı Konfransının sənədlərinə istinad olunur”.
Tavini Huiraatira Partiyasının sədr müavinin xarici əlaqələr üzrə müşaviri Marania Vaianui söyləyib ki, Fransa BMT-nin qətnamələrinə riayət etmir:
“Biz mövcud potensialımızdan istənilən sahədə istifadə edə bilərik. Davamlı inkişaf nöqteyi-nəzərindən bu resursların idarəolunması effektiv şəkildə aparılmalıdır. Enerji müstəqilliyi baxımından külək enerjisi, okean enerjisi kimi resursların genişləndirilməsi çox mühüm amillərdəndir. Siyasi və diplomatik mövqeyimizə gəlincə, ərazimizdə iqtisadi zonanın yerləşməsi bizə mühüm dividend qazandırır. 23 avqust 2013-cü il tarixli qətnamə qeyd edir ki, biz müstəmləkədən azad olmalıyıq. Lakin Fransa bu qətnamənin tələblərini qətiyyən icra etmir. Bizim xalq olaraq azadlığımıza 193 ölkə dəstək göstərməlidir”.
Bakı Təşəbbüs Qrupunun rəhbəri Abbas Abbasov bildirib ki, belə konfranslar müstəmləkədən əziyyət çəkən regionlardakı vəziyyəti dünya ictimaiyyətinə çatdırmağa hesablanıb.
Onun sözlərinə görə, dövlət başçısının kolonizasiya siyasətinə qarşı mövqeyi bu siyasəti dəstəkləyənlərə nümunədir.
Tədbirdə o da bildirilib ki, Bakı Təşəbbüs Qrupu ilə Polineziyanın hakim partiyası arasında memorandum imzalanıb.
Fransız Polineziyası Assambleyasının Turizm və Mədəniyyət işləri üzrə komissiyasının katibi Kliff Loussan isə bölgənin geniş turizm imkanlarından danışıb.
O deyib ki, Fransa bu potensialın inkişafına mane olur:
“Bu gün Fransa regionumuzda turizmin inkişafına mane olur Biz çox istərdik ki, müstəmləkəçi dövlətlər və müttəfiqləri bizim səsimizi eşitsin və bundan sonra xalqlarımız azad yaşasın”.
Konfransda diqqətə çatdırılıb ki, 2017-2020-ci illərdə əhalinin 7 faizi Fransız Polineziyasını tərk edib ki, onların əksəriyyəti 18-25 yaşlı gənclərdir.
Tədbirdə həmçinin kanak xalqı da daxil olmaqla, müstəmləkə şəraitində yaşayan xalqlara dəstək ifadə olunub.
