Azərbaycan 200 ildən sonra tam suveren şəkildə ilk dəfə əzəmətli bayramını qeyd edir. Demək olar ki, son üç ildə təqvimizin hər günü bir bayrama çevrilib. Tarixən təqvimi hüznlü günlərlə dolu olan bir xalqın artıq güzəranı bayram ab-havası ilə keçir.
200 ildən sonra ilk dəfədir ki, Azərbaycanın əlamətdar və sevincli günü bütün suveren ərazilərimizdə qeyd olunur. Ölkəmiz cənubundan şimalına, şərqindən qərbinə sərhədlərimizə qədər dövlət bayrağımızla bəzədilib. Həzin külək Azərbaycanın həsrətində olduğumuz Xankəndi, Xocalı şəhərlərində ucaldılan bayrağımızı dalğalandırır, Günəş isə öz nurunu bu şəhərlərə səpələyir.
Bütün bunları xalqımıza, dünya azərbaycanlılarına bəxş edən Milli Sərkərdə İlham Əliyevdir.
İlham Əliyev Azərbaycanın tarixində iki əsrlik ayrılıqdan suverenliyə gedən yolda cığırları tək başına açaraq xalqı öz ardıyca irəliyə aparan sərkərdə deyilmi? Bu torpaqlarda yaşayan və tarixən ərazilərimizə göz dikmiş yadelli düşmənlərə qarşı vuruşan ulu əcdadlarımızın indi ruhu şad və xürrəmdir. Azərbaycan tarix boyu İlham Əliyev kimi sərkərdəyə möhtac olub, ehtiyaclı olub. Allah bizi özümüzdən başqa kimsəyə möhtac etməsin deyimi artıq reallaşıb. Biz məhz Ali Baş Komandanın sayəsində heç kəsə möhtac olmadıq və olmayacağıq.
Bu gün xalq olaraq, dünya azərbaycanlıları olaraq Zəfər bayramımızı qeyd edirik.
Zəfərimiz əbədi olsun!
Toğrul Allahverdili
GTİD və Diaspor İnformasiya Mərkəzinin sədri
