İnterpress.az-ın məlumatına görə, ötən həftənin sonlarında AŞ PA-nın hüquqi məsələlər və insan hüquqları komitəsinin məruzəçisi Alan Desteks Azərbaycanda səfərdə oldu. Prezident İlham Əliyevlə görüşən Alan Desteks baş prokuror Zakir Qaralovun da qəbulunda olub.
Qonaq araşdırmaçı jurnalist Xədicə İsmayıl və blogger Mehman Hüseynovla, eləcə də, vətəndaş cəmiyyətinin tanınmış simaları, hüquq müdafiəçiləri ilə görüşüb. Alan Desteksin Bakı səfərindən sonra siyasi məhbuslar məsələsi bir daha gündəmə gəlib. Bu səfərin gələn ayda imzalanacağı gözlənilən əfvə ciddi təsir edəcəyi, bir çox tanınmış siyasi məhbusun azadlığa buraxılacağı deyilir.
AŞ PA məruzəçisi ilə görüşdə iştirak edən hüquq müdafiəçisi Novella Cəfəroğlu təəssüratlarını bizimlə bölüşdü: “Hər qrupla görüşdü. Bizim də qrup var və bu qrupa daxil olan hüquq müdafiəçiləri cənab Alan Desteks görüşdü. Biz istərdik ki, hamı ilə görüşsün. Hamının fikrini öyrənməli idi. Bir çox məsələləri müzakirə etdik. Bizim ölkədən bir qrup şəxs Avropa Şurasında səsimizin alınması üçün müraciət ünvanlayıb. Anlaya bilmirəm ki, səsimiz alınandan sonra Avropa Şurası bizə necə köməklik edəcək? Bizdən soruşanda açıq şəkildə dedik ki, biz o məktuba qarşıyıq. Çünki Avropa Şurasından çıxmaq ölkəmizə heç nə gətirmir. Bir qrup hüquq müdafiəçisi Avropada oturub, tez-tez bəyanatlarını verirlər. Bizdən məsələləri soruşmaq lazımdır. Öz sözümü görüşdə dedim. Siyasi məhbuslar məsələsini müzakirə etdik. Bildirdik ki, onlar azad olunsun. Sonra islamçıların məsələsini həll edək. Amma onlar 180 və müxtəlif rəqəmlərdə siyahılar hazırlayırlar. Orada elə şəxslər var ki, heç onların siyasətlə əlaqələri yoxdur. Belə rəqəmlə siyahılar hazırlayanda sırf siyasi məhbus olanları pis vəziyyətə qoyurlar. Məruzəçinin səfərindən tam razı da qalmadım. Bizimlə görüşdü deyə razı qaldığımı deyə bilmərəm. Elə görüşməli olduğu şəxslər var idi ki görüşmədi. Elə hüquq müdafiəçiləri var ki, onunla görüşə bilmədilər, halbuki uzun illərdir bu işlə məşğul olurlar. Hamımızla bir görüş təşkil olunsaydı, sözümüzü deyərdik. Ümid edirik ki, martda əfv veriləcək və bir çox şəxs azadlığa çıxacaq. Bir qrup hüquq müdafiəçisi var ki, bu yolda canlarını qoyublar. Amma heç biri Alan Destekslə görüşə bilmədi. Burada nə deyiblər bilmirik, amma onların görüşə bilməmələrinə çox pis olduq”.
AŞ PA məruzəçisi ilə görüşə bilməyən hüquq müdafiəçisi Mirvari Qəhrəmanlı Alan Desteksin bu vəzifəyə yeni təyin olunduğunu söylədi: “Ölkəyə gələn hər bir məruzəçi müxtəlif istiqamətlərdə görüşlər keçirməli, hər kəsin fikrini öyrənməlidir. İmkan çatdığı qədər bunları etməlidir. Ötən il siyasi məhbuslarla bağlı beynəlxalq aləmdən çox təbriklər gəldi, amma dekabrda əfv olmadı. Bu səfərin Novruz əfvinə təsirinin olacağını demək olmaz. Təbii ki, o səfərində siyasi məhbuslar məsələsini gündəmə gətirə bilər, öz təkliflərini verər. Hər bir təşkilatın nümayəndəsi səfər edəndə ölkədəki insan hüquqları ilə bağlı öz fikirlərini deyir. Təbii yəqin o da öz fikrini deyib. Düşünürəm ki, martda əfv gözləniləndir. Ümid edirəm ki, arzuladığımız şəxslərin adı da o siyahıda olacaq. Əfv Komissiyası daha geni. Siyahı hazırlaya bilər. Əfvin verilməsi çox vacibdir. Prezidentin böyük əfv sərəncamı verəcəyinə inanırıq”. (musavat)
İnterpress.az
