“Sentyabrın əvvəlində Pekində açılan Azərbaycan Ticarət Evi ölkələr arasında ticari-mədəni mübadilə baxımından mühüm rol oynayacaq”.
“İnterpress.az” xəbər verir ki, bunu “Report”a müsahibəsində Çinin Azərbaycandakı səfirliyinin ticarət və iqtisadi məsələlər üzrə müşaviri Ma Çi deyib.
“Bu, həmçinin Azərbaycanın milli imicinin formalaşmasına, “Made in Azerbaijan” brendlərinin tətbiqinə və populyarlaşmasına, Azərbaycan və Çin arasında ticarət əlaqələrinin daha səmərəli təşviqinə töhfə verəcək”, – o vurğulayıb.
Onun sözlərinə görə, ticarət evi ixtisaslaşmış Azərbaycan məhsullarının Çinə tədarükünü asanlaşdıracaq və bir çox çinli sahibkara Azərbaycan bazarı və istehsal sahələri haqqında intuitiv anlayış vermiş olacaq: “Düşünürəm ki, böyük Çin bazarı və böyük istehlak tələbi Azərbaycan üçün çoxlu inkişaf imkanları açacaq”.
