2020-ci il noyabrın 10-da Prezident İlham Əliyevin xalqa müraciəti nəticəsində 44 günlük Vətən müharibəsi başa çatdı. Çünki Ermənistanın Baş naziri Nikol Paşinyan müharibəni davam etdirmə gücündə olmadıqlarını bildirərək kapitulyasiya aktını imzaladı.
Həmin günədək rəşadətli Azərbaycan Ordusu hərbi gücü ilə artıq Füzuli, Cəbrayıl, Zəngilan, Hadrut və Şuşanı düşməndən azad etmişdi. Ağdam, Laçın, Kəlbəcər isə imzalanan üçtərəfli sazişə əsasən Azərbaycana qaytarıldı.
İndi cəmiyyəti bir sual düşündürür: Dünya tərəfindən rəsmi olaraq Azərbaycan ərazisi kimi tanınan Xankəndi, Xocalı, Xocavənd nə zaman Azərbaycanın nəzarətinə keçəcək? Hazırda həmin ərazilər rus sülhməramlılarının nəzarətində hesab olunur. Lakin görünən odur ki, onlar vəziyyətə tam nəzarət edə bilmir və yaxud da bilərəkdən üçtərəfli bəyanata zidd olaraq addımlar atırlar.
Mövzu barədə fikirlərini Yenisabah.az-la bölüşən Milli Məclisin Xocalıdan olan deputatı Elman Məmmədov qeyd edib ki, bütün ərazilərimizi işğalçılardan, separatçılardan, cinayətkarlardan təmizləyəcəyik:
“Biz buna nə göz yumacağıq, nə dözəcəyik, nə də səbr edəcəyik. 2020-ci 10 noyabr sazişinə əsasən, bu məsələni sülhməramlı missiyasını boynuna götürən Rusiya həyata keçirməli idi. Yəni Azərbaycan ərazisində olan bütün qeyri-qanuni silahlı birləşmələri çıxarmalı idi.
Ancaq həmin razılaşmadan 9 aydan çox vaxt keçib. Rusiya sülhməramlıları bu işi görmək əvəzinə, ermənilərin Qarabağda qalıb daha da möhkəmlənməsinə, dirçəlməsinə köməklik göstərir, onlara himayədarlıq edir.
Mən bunu dəfələrlə demişəm. Separatçılara silah-sursat, yanacaq, ərzaq və digər təminatların gətirilməsi üçün yeganə yol Laçın dəhlizidir. Laçın dəhlizi isə müvəqqəti olaraq Azərbaycan ərazisində yerləşmiş sülhməramlıların nəzarətindədir. Demək, sülhməramlılar bir növ bunların orada qalıb fəaliyyət göstərməsinə havadarlıq edirlər”.
Millət vəkili Azərbaycanın antiterror əməliyyatına başlamalı olduğunu vurğulayıb:
“Azərbaycan qanunları ilə cinayətkar elan olunub axtarışa verilmiş Arayik, Balasanyan, Sarkisyan, Köçəryan kimi canilər, hərbi qatillər sərbəst hərəkət edirlər. Azərbaycan artıq öz ərazisində belə qeyri-qanuni cinayətkar separatçı qurumun və ona aid olan şeylərin qalmasına dözməyəcək. Bunun üçün biz həm öz Konstitusiyamıza, həm də beynəlxalq hüquqa, BMT-nin nizamnaməsinə əsaslanıb ərazimizdə antiterror əməliyyatlarına başlamalıyıq, onlar ya çıxıb getməlidirlər, ya da məhv olmalıdırlar.
Başqa bir fikir ola bilməz. Hamımız bunu səbrsizliklə gözləyirik, mən də bir Xocalı sakini kimi doğma yurd-yuvama qayıtmaq istəyirəm. Bütün xocalılılar, xankəndililər, ağdərəlilər, xocavəndlilər bu arzudadır. Bunun üçün də ərazimiz düşməndən təmizlənməlidir. Əgər sülhməramlılar bunu etmirsə, düşmən də könüllü olaraq fikrindən əl çəkmirsə, biz ləngimədən öz işimizi görməli, hərbi gücümüzdən istifadə etməliyik”.
