Almaniyanın federal daxili işlər naziri Nensi Fesser nümayəndə heyəti ilə birlikdə ilk dəfə Gürcüstana rəsmi işgüzar səfər edib.
Bu barədə İnterpress.az xarici mediaya istinadən xəbər verir.
Tbilisi Beynəlxalq Hava Limanında federal naziri Gürcüstanın daxili işlər nazirinin müavini Aleksandr Daraxvelidze və Gürcüstanın Almaniya Federativ Respublikasındakı fövqəladə və səlahiyyətli səfiri Levan İzoriya qarşılayıblar.
Səfər çərçivəsində Nensi Fezerin daxili işlər naziri Vaxtanq Qomelauri ilə görüşü nəzərdə tutulub.
Qeyd edək ki, bu il dekabrın 15-də Almaniya parlamenti Gürcüstanın təhlükəsiz mənşə ölkəsi kimi tanınması ilə bağlı qanunvericilik aktı qəbul edib.
Almaniya hökumətinin qəbul etdiyi bu qərar Gürcüstanın hüquqi və demokratik dövlət olduğunu, burada insan hüquqlarının lazımi səviyyədə qorunmasının təmin edildiyini təsdiqləyir.
Səfər çərçivəsində Gürcüstan hökuməti ilə Almaniya Federativ Respublikası Hökuməti arasında miqrasiya və mobillik haqqında sazişin imzalanması planlaşdırılır.
Müqavilə Gürcüstan və Almaniya Federativ Respublikası arasında əmək miqrasiyası və təhsil sahəsində əməkdaşlığı gücləndirmək məqsədi daşıyır və gürcü tələbə və tədqiqatçılar üçün təhsil və təcrübə proqramları daha intensiv həyata keçiriləcək.
Saziş yuxarıda qeyd olunanlara əlavə olaraq, qeyri-qanuni miqrasiyaya qarşı mübarizənin gücləndirilməsini nəzərdə tutur ki, bu da vizasız gediş-gəliş rejimini pozan Gürcüstan vətəndaşlarının readmissiyası və reinteqrasiyasının təmin edilməsi istiqamətində əməkdaşlığın gücləndirilməsini nəzərdə tutur.
Qeyd edək ki, readmissiya proqramı 2010-cu ildə Gürcüstanla Avropa İttifaqı arasında icazəsiz yaşayan şəxslərin readmissiyası haqqında imzalanmış sazişin qüvvəyə minməsindən sonra 2011-ci il martın 1-dən uğurla həyata keçirilir.
