Ermənistan Milli Təhlükəsizlik Xidmətinin (MTX) istintaq idarəsi yüksək rütbəli hərbçi tərəfindən törədilmiş dövlətə xəyanət faktı ilə bağlı cinayət işinin istintaqını başa çatdırıb.
İnterpress.az “Armenian News”a istinadla xəbər verir ki, iddiaya görə, təqsirləndirilən şəxs Gürcüstanda olarkən, Azərbaycan xüsusi xidmət orqanlarının nümayəndələri tərəfindən ələ alınıb. Həmin şəxs qondarma DQR və Ermənistanın silahlı qüvvələri barədə xüsusi tapşırıqlar alıb. Dövlət sirrini ehtiva edən məlumatlara sahib olduqdan sonra təqsirləndirilən şəxs topladığı məlumatları Gürcüstanda, Azərbaycan səfirliyi ərazisində keçirilən görüşlər daxil olmaqla, Azərbaycanın kəşfiyyat xidmətlərinin nümayəndələrinə çatdırıb. Bu görüşlərdən əlavə, onlarla telefonla da əlaqə qurub və alınan məlumatları hissə-hissə ötürüb.
Keçmiş hərbçi CM-in 299-cu maddəsinin 1-ci hissəsi (dövlətə xəyanət) ilə ittiham olunub və barəsində həbs qətimkan tədbiri seçilib.
Axtarışlar zamanı onun mənzilində çoxlu miqdarda silah-sursat, habelə dövlət sirri olan sənədlər tapılıb. Təqsirləndirilən şəxsin mənzilində radioötürücü, digər rabitə vasitələri, Azərbaycan xüsusi xidmət orqanları ilə əlaqə qurmaq üçün telefon nömrələri tapılıb.
Bundan əlavə, eyni şəxsin mütəşəkkil bir qrupun bir hissəsi kimi fəaliyyət göstərdiyi, qanunsuz olaraq lisenziyalaşdırılan sahibkarlıq fəaliyyəti ilə məşğul olduğu, xüsusən də, bir dostu ilə birlikdə 200-dən çox tank alıb Ermənistan Respublikasına gətirdiyi məlum olub.
İnterpress.az
