BMT Pakistanın Əfqanıstana hava zərbələrini beynəlxalq hüququn mümkün pozuntusu kimi qiymətləndirib.
İnterpress.az xəbər verir ki, bu barədə BMT-nin Əfqanıstanda insan haqları üzrə xüsusi məruzəçisi Riçard Bennett məlumat verib.
BMT-nin məlumatına görə, Pakistanın Əfqanıstanın Kunar və Hilmənd vilayətlərinə endirdiyi hava zərbələri nəticəsində ən azı 10 dinc sakin, əsasən uşaqlar həlak olub, daha 9 nəfər yaralanıb.
Riçard Bennett hücumların beynəlxalq humanitar hüquq və insan hüquqlarının mümkün pozuntusu ola biləcəyini bildirib.
Pakistan hakimiyyəti zərbələrin silahlı qruplaşmaların təlim düşərgələrinə və anti-Pakistan təbliğat videolarının hazırlandığı studiyaya endirildiyini, nəticədə 22 döyüşçünün öldürüldüyünü açıqlayıb.
Əfqanıstan hakimiyyəti isə üç yaşayış evinin dağıldığını bildirib.
Xuraman Etibarlı
İnterpress.az
