İstanbulda 19 ildən sonra dəhşətli cinayətin üstü açılıb.
İnterpress.az xəbər verir ki, bu barədə Türkiyə mətbuatı məlumat yayıb. 2006-cı ildən bəri itkin düşmüş hesab edilən təqaüdçü müəllimin keçmiş şagirdi tərəfindən qətlə yetirildiyi məlum olub.
İstanbulda 2006-cı ildə itkin düşməsi barədə polisə müraciət edilən müəllim Hikmət Akçayın əslində öldürüldüyü üzə çıxıb.
Araşdırmalar nəticəsində məlum olub ki, onu orta məktəbdə dərs dediyi şagirdi Esin B. qətlə yetirib. Qız müəllimini öldürdükdən sonra cəsədini çamadana qoyaraq yandırıb.
Saxlanılan Esin B. ifadəsində hadisənin təfərrüatlarını danışıb:
“O, orta məktəbdə müəllimim idi. Ailəmlə ünsiyyətdə olurdu və maddi çətinliyimiz olduğu üçün bizə kömək edirdi. Liseydə oxuyarkən kimya müəllimi ilə görüşdüyüm üçün mənə əsəbiləşirdi. ‘Evli kişilərlə nə işin var?’ deyirdi. Bir gün yenidən mübahisə etdik və mən qəzəblənib onu bıçaqladım”.
İstintaq zamanı maraqlı bir detal da üzə çıxıb. İtkin düşməklə bağlı müraciət edilərkən polisə təqdim olunan səs yazılarında Akçayın Esin B.-yə xəbərdarlıq etdiyi eşidilir: “Sən evli kişilərlə görüşürsən. Əgər bu münasibətləri bitirməsən, səni parçalayıb çamadana qoyaram”.
Lakin taleyin acı kinayəsi kimi, müəllim özü keçmiş şagirdi tərəfindən öldürülərək çamadanın içində yandırılıb.
Xuraman Etibarlı
İnterpress.az
