İnterpress.az xəbər verir ki, Turan Mədəniyyət Mərkəzi azərbaycanlı şair, ictimai xadim Sabir Rüstəmxanlı, Azərbaycan Türk Qadınlar Birliyinin sədri Tənzilə Rüstəmxanlının iştirakı ilə Türkiyədə “Müstəqilliklərinin 25-ci ilində Azərbaycan və Türk respublikaları” adı altında konfrans keçirib.
Tədbirdə çıxış edən xalq şairimiz Sabir Rüstəmxanlı, Azərbaycanın müstəqillik uğrunda apardığı mübarizəni və qarşılaşdığı problemləri ətraflı şəkildə izah edib. 90-cı illərdə Azərbaycan Respublikasının müstəqillik qazanması prosesində birbaşa iştirak edən və istər ölkə daxilində, istərsə də xaricdə müstəqilliyimizin qarşısında maneə yaradanlara qarşı ön cərgələrdə mübarziə aparan Sabir Rüstəmxanlı, Azərbaycan Xalq Cumhuriyyətinin də şərəfli tarixindən söz açıb. O, ermənilərin dəstəyi ilə Rusiyanın türk amilini Qafqazdan sıxışdırıb çıxarma cəhdlərini də gözardı etməyib.
Tədbiri Azərbaycan Türk Qadınlar Birliyinin sədri Tənzilə Rüstəmxanlı davam etdirib. O bildirib ki, Azərbaycan dövlət müstəqilliyi uğrunda mübarizə aparanda da, bu mübarizəni qazandıqdan sonra da Türkiyə Azərbaycanın dəstəkçisi olub. 25 il ərzində Azərbaycanda siyasi həyatının dəyişməsinə diqqət çəkən Tənzilə Rüstəmxanlı, Türkiyə-Azərbaycan münasibətlərinin heç vaxt dəyişmədiyini vurğulayıb. O, nitqini bu sözlərlə yekunlaşdırıb: “Azərbaycan və Türkiyə başda olmaqla, Türk dünyasının müxtəlif rənglərinin xarici qüvvələr tərəfindən fərqlilik kimi qələmə verilməsinə və bununla belə bizi bölməsinə əsla icazə verməyəcəyik. Tam əksinə tarix, mədəniyyət və soy birliyimizi daha güclü inkişaf etdirərək gələcəyimizə əmin addımlarla irəliləməyimiz lazımdır”.
Xatırladaq ki, tədbir Azəri –Türk Qadınlar İçtimai Birliyi və Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə təstəyi ilə həyata keçirib.
İnterpress.az
