Musavat.com-un verdiyi xəbərə görə, hakim Eldar İsmayılovun sədrliyi ilə keçirilən prosesdə şahidlər ifadə verib. İlk şahid yanğın baş verərkən binada yaşayan Xuraman Hüseynova olub.
“7800 manat zərər dəyib, ancaq bu məbləği ala bilmədim”
O, yanğın baş verən binada kirayədə yaşadığını və evdə olan bütün əşyalarının yandığını söyləyib: “Biz Ağdamdan məcburi köçkünük. Bərdədən Bakıya köçmüşdük. Uşaqlarımız burada universitetdə oxuyurdu. Evdə olan bütün əşyalar bizə məxsus idi. Yanğın zamanı bütün əşyalarımız külə döndü. İlk hesablamada FHN əməkdaşları dedi ki, 7800 manat zərər dəyib. Ancaq bu məbləği ala bilmədim”.
Şahid bildirib ki, ona dəymiş zərəri ala bilməməsinin səbəbkarı ev sahibi olub: “Aylıq 300 manat kirayə pulu verirdik. Uzun müddət o evdə yaşadıq. Yanğın zamanı evdə olan bütün əşyalarımız yandı. Evə 15 min manat kompensasiya verdilər. Ancaq ev sahibinin övladları da həmin puldan pay istədilər. Beləliklə də problem yarandı. Biz razı olduq ki, 5 min manat ev sahibi versin. Notariusda sənəd imzaladıq ki, 5 min alacam. Amma 4 min aldım. 1000 manatı da bankda ev sahibinə verdim. Biz onlarla bacara bilməzdik. Razılaşıb çıxdıq”.
Sahə rəisi: “1500 manat maaş alırdım”
Məhkəmədə digər şahid qismində Akif Musayev ifadə verib. O, yanğın baş verən binada üzləmə işlərini həyata keçirən TNH şirkətinin işçisi olub.
Xətaidə Zığ yolunda üzlənən 5 binaya nəzarəti həyata keçirən və sahə rəisi olduğunu deyən A.Musayev bildirib ki, yanğın baş verən binaya nəzarəti o həyata keçirməyib: “Həmin əraziyə kimin nəzarət etdiyini bilmirəm. Mən digər 5 binaya nəzarət edirdim. Tikinti işlərinə baxırdım. Görülən işlər də layihəyə uyğun idi”.
O, işə düzəlməsini, çalışdığı müddət ərzində gördüyü işləri belə danışıb: “Özüm müəssisə rəhbəri idim. Ancaq bir müddət işsiz qaldım. İş üçün TNH şirkıtinə müraciət etdim. Sahə rəsi olaraq işə başladım. 1500 manat maaş alırdım. Zığ yolunda üzlənən binalara nəzarət edirdim. Material gəlirdi, sahədə işlər aparırdıq. FHN-dən, Bakı Şəhər İcra Hakimiyyətindən də gəlib, bizim işlərə baxırdılar. Mən layihənin rəhbəri olaraq Rəşad Quliyevi tanıyırdım. Yanğından sonra indi təqsirləndirilən Fərid Sadıqovu tanıdım və onun şirkət rəhbəri olduğunu bildim”.
Şahid bildirib ki, sifarişçinin Bakı Şəhər İcra Hakimiyyəti olduğu haqda onda məlumat olub və elə icra hakimiyyətindən də bu işlərə nəzarət edilib.
Akif Musayev onu da əlavə edib ki, yanğından sonra üzlənən bütün binaların söküntü işlərini də o, həyata keçirib: “Üzlənən binaları da özümüzə sökdürdülər. Həmin vaxt da nəzarət Ekologiya Nazirliyinə verilmişdi. Biz də bütün binaları yenidən üzləyib, təhvil verdik”.
Dövlət ittihamçısının və hakimin suallarını cavablandıran şahidin istintaqa verdiyi ifadə ilə məhkəmədə verdiyi ifadələr arasında ziddiyyətlərin olduğu məlum olub.
O, daha çox şirkətə rəhbərlik edən şəxslərin kimliyi haqda danışarkən ziddiyyətli fikirlər səsləndirib. Daha sonra bina üzlükləri istehsal edən zavodun direktorunun Məmməd Vəliyev, THN şirkətinin rəhbərinin isə Fərid Sadıqov olduğunu deyib. Bu ziddiyyətli fikirlərini isə unutqanlıqla əlaqələndirib.
Şirkət vergidən necə yayınıb?
Digər şahid isə şirkətin mühasibi olmuş Könül Abbasova olub. K.Abbasova 2014-cü ilin dekabrında işdən çıxdığını deyib. Prokurorun suallarını tam olaraq cavablandıra bilməyən K.Abbasova bildirib ki, şirkətdə qısa bir müddət ərzində çalışıb və verilən göstərişləri yerinə yetirib.
Məhkəmədə məlum olub ki, şirkətdə vergi hesabatları verilmirmiş. Mühasib xanım bunu şirkət rəhbərliyin şəxsi fəaliyyəti və işi kimi dəyərləndirib. Suallara cavab verən K.Abbasova rəhbərlik tərəfindən işdən çıxarıldığını söyləyib.
Məlumat üçün bildirək ki, şahidlərin ifadəsində adı çəkilən Məmməd Vəliyev hazırda ölkəni tərk edib. Əvvəlki məhkəmə proseslərində çıxış edən təqsirləndirilən şəxslər isə özlərini təqsirli bilmədiklərini deyiblər.
Qeyd edək ki, hadisə ötən il aprelin 10-da Bakı şəhəri, Xətai rayonu, Zığ yolu küçəsi 16 saylı ünvanda baş verib. Həmin ünvanda TNH şirkəti tərəfindən fasadında “poliuretan” materialla üzləmə işləri aparılan doqquzmərtəbəli yaşayış binasında ağır nəticələrə səbəb olan yanğın qeydə alınıb. Faktla bağlı Baş Prokurorluğun Ağır Cinayətlərə Dair İşlər üzrə İstintaq İdarəsində Cinayət Məcəlləsinin müvafiq maddələri ilə cinayət işi başlanıb.
Məhkəmə prosesi oktyabrın 25-də davam etdiriləcək.
İnterpress.az
