Pişiklər sahiblərinə qarşı emosional bağlılıq hiss etmirlər.
İnterpress.az xəbər verir ki, bu barədə xarici KİV-lər alimlərin son araşdırmasına istinadən məlumat yayıb.
Tədqiqatçılar pişiklər və insanlar arasındakı bağlılıq barədə geniş yayılmış mifi yoxlayaraq gözlənilməz nəticəyə gəliblər.
Məlum olub ki, pişiklər itlərdən fərqli olaraq öz sahibləri ilə güclü emosional əlaqə qurmağa ehtiyac duymurlar.
Alimlər bu qənaətə gəlmək üçün uşaqların valideynlərinə, yaxud itlərin sahiblərinə bağlılığını yoxlayan “yad vəziyyət testi”ndən istifadə ediblər.
Tədqiqatın nəticələri aşağıdakı faktları üzə çıxarıb:
-
Pişiklər insanı “təhlükəsizlik bazası” kimi qəbul etmirlər və istənilən stress vəziyyətində yalnız özlərinə güvənirlər;
-
Heyvanlar üçün yanlarında kimin olmasının fərqi yoxdur; onlar öz sahiblərindən yad insanla müqayisədə daha çox müdafiə axtarmırlar;
-
Tanış insanın və ya tamamilə yad birinin yanında pişiklərin keçirdiyi təşviş səviyyəsi tamamilə eynidir;
-
Heyvanların davranışı yalnız onların xarakterindən asılıdır; ünsiyyətcil pişiklər hər kəslə vaxt keçirir, qorxaqlar isə sahibindən də, yad adamdan da eyni dərəcədə qaçırlar;
-
Pişiklər sahibindən ayrıldıqda qorxu hissi keçirmirlər. Onların gedən insanın ardınca miyoldaması qorxudan deyil, darıxmaqdan və ya yüngül qıcıqlanmadan irəli gəlir.
Mütəxəssislər qeyd edirlər ki, pişik sahibinin başında yatmağı xoşlasa belə, psixoloji cəhətdən o, müstəqil yırtıcıdır və insan olmadan da rahat yaşaya bilər.
Tarixən bu heyvanlar insanların yanında əsasən qida mənbəyinə görə qalıblar və təkbaşına sağ qalmaq məcburiyyətində qaldıqda dərhal müstəqilləşə bilirlər.
Xuraman Etibarlı
İnterpress.az
