Azəri –Türk Qadınlar Birliyi Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə yardımı ilə Azərbaycanın müstəqilliyinin bərpa olunmasının 25 illiyi ilə əlaqədar “Azərbaycan dövlət müstəqilliyinin 25 illik həqiqətlərinin beynəlxalq ictimaiyyətə çatdırılması” adlı tədbir keçirilib. İnterpress.az xəbər verir ki, tədbiri Azəri –Türk Qadınlar Birliyinin sədri Tənzilə Rüstəmxanlı açaraq layihə haqqında məlumat verib.
Daha sonra, isə Millət vəkili Fəzail İbrahimli çıxış edib. Millət vəkili çıxışında 18 oktyabrla bağlı yaxın keçmiş tariximizdən, müstəqillik uğrunda aparılan mücadilədən danışıb. Müstəqilliyi asan qazanılmadığını bildirən F. İbrahimli azadlıq uğrunda canlarında keçən şəhidlərimizi də yad edib.
Müstəqillik tarixindən danışan keçmiş təhsil naziri Firudin Cəlilov isə mədəniyyətimizin, əxlaqımızın, etnoqrafik, folklor dəyərlərindən söz açıb.
Qeyd edək ki, tədbirlərin keçirilməsində məqsəd 25 illiyini qeyd edəcəyimiz Azərbaycan dövlət müstəqilliyi ilə bağlı həqiqətlərin beynəlxalq ictimaiyyətə çatdırılmasıdır.
Tədbirdə Azərbaycanın Müstəqillik Aktına imza atanlardan biri də Xalq Şairı, VHP-nin sədri Sabir Rüstəmxanlı da iştirak edirdi və müstəqillik tarizimizə nəzər salan xalq şairi o zamanki ağır durumdan və müstəqillik uğrunda aparılan meydan savaşlarından danışdı.
Tədbir davam edir.
İnterpress.az
