Azərbaycan Respublikasının Prezidenti İlham Əliyev Almaniya Prezidenti ilə keçirdiyi görüşdə Ermənistanla sülh müqaviləsinin əldə olunması üçün irəli sürdüyü şərtləri bir daha açıqlayıb. Dövlət başçısı sülhün yalnız Ermənistanın Azərbaycanın ərazi bütövlüyünü və suverenliyini tanıması şərti ilə mümkün olduğunu vurğulayıb.
Milli Məclisin deputatı Hikmət Babaoğlu “İnterpress.az”a açıqlamasında Prezident İlham Əliyevin Almaniya prezidenti ilə görüşdən sonra səsləndirdiyi fikirləri şərh edərək, bildirib ki, Ermənistanın Azərbaycanın ərazi bütövlüyünə qarşı davam edən iddiaları bölgədə yeni müharibə riskini artırır:
“Azərbaycan Prezidenti İlham Əliyev Almaniya Prezidenti ilə görüşündə bir daha sülhün əldə olunmasının vacibliyini vurğulayıb. Dövlət başçısı bildirib ki, Ermənistan öz konstitusiyasında dəyişiklik etmədikcə və Minsk Qrupunun ləğv olunmasına dair Azərbaycanla birlikdə BMT-yə müraciət etmədikcə, sülh mümkün olmayacaqdır. Həqiqətən də, bu iki maneə mövcud olduğu halda sülhün əldə edilməsi qeyri-mümkündür”.
Onun sözlərinə görə, əgər Ermənistanın Azərbaycana qarşı ərazi iddiası davam edərsə və bu, konstitusiyada öz əksini taparsa, gələcəkdə Qarabağ torpaqlarına hüquqi iddialar irəli sürən yeni nəsillər yetişəcək:
“Bu da, Ermənistan ictimaiyyətində Qarabağın ermənilərə aid olması və ya Ermənistan torpaqları olması barədə ümumi bir fikir formalaşdıracaqsa, yeni müharibə riskini qaçılmaz edəcək. Belə bir halda imzalanan sülhün heç bir əhəmiyyəti olmayacaq. Azərbaycan Prezidenti bir daha bu məsələnin vacibliyini diqqətə çatdıraraq bildirib ki, olmayan problemi həll etmək üçün heç bir qurum lazım deyil. ATƏT-in Minsk qrupunun məqsədi Qarabağ problemini həll etmək idi, lakin artıq bu problem aradan qalxdığından belə bir qrupun saxlanmasına ehtiyac yoxdur”.
“Azərbaycan Prezidenti bu fikirləri yalnız Almaniya Prezidentinə deyil, həm də bütövlükdə kollektiv Qərbə və dünyaya mesaj olaraq səsləndirib. Bu mesajda qeyd olunur ki, Ermənistanın ərazi iddiaları və Qarabağla bağlı mövqeyi dəyişmədiyi təqdirdə, Azərbaycan heç vaxt sülhə razı olmayacaq. Çünki belə bir sülhün heç bir mənası olmayacaq”, – deyə o fikirlərini tamamlayıb.
Məsimə Məmmədova
