Cənubi Saxalində bina uçub, yaralılar və dağıntılar altında qalanların olduğu bildirilir.
İnterpress.az xəbər verir ki, bu barədə Rusiya KİV məlumat yayıb. Anbarın damına beton tökülərkən konstruksiya çöküb, xilasetmə işlərini donan beton çətinləşdirir.
Məlumata görə, Cənubi Saxalində tikilməkdə olan anbarın dam hissəsinin uçması nəticəsində 4 nəfər yaralanıb, 3 nəfər isə dağıntılar altında qalıb.
Hadisə dam örtüyünə beton tökülən zaman baş verib. Konstruksiyalar ağırlığa tab gətirməyib və yuxarıda işləyən fəhlələrlə birlikdə aşağıda olan digər işçilərin üzərinə aşıb.
Fövqəladə Hallar Nazirliyinin əməkdaşları dörd saatdan çoxdur ki, hadisə yerində dağıntıları təmizləməklə məşğuldurlar.
Xilasetmə işlərini çətinləşdirən əsas məqam təzə tökülmüş betonun bərkiməyə başlamasıdır.
Faktla bağlı İstintaq Komitəsi tərəfindən tikinti işlərinin aparılması zamanı təhlükəsizlik qaydalarının pozulması maddəsi ilə cinayət işi açılıb.
Xuraman Etibarlı
İnterpress.az
