Çexiya Respublikası məhkum edilmiş ifrat sağçı fəal Marla Liebixin Almaniyaya ekstradisiyasını təsdiqləyib.
İnterpress.az xəbər verir ki, bu barədə BİLD məlumat yayıb.
Praqadakı Ali Torpaq Məhkəməsi Almaniyada məhkum olunmuş sağ radikal fəal Marla Sveni Liebixin Almaniyaya ekstradisiyası ilə bağlı verdiyi şikayətləri rədd edib.
Məhkəmə nümayəndəsinin açıqlamasına görə, qərardan sonra Almaniyanın Saksoniya-Anhalt federal əyalətinin polisi çex hüquq-mühafizə orqanları ilə birlikdə Liebixin Almaniya tərəfinə təhvil verilməsi prosesini təşkil edəcək.
Məlumata əsasən, Liebix 2023-cü ilin iyulunda, hələ Sven adı ilə tanındığı dövrdə Almaniyada bir il altı ay azadlıqdan məhrumetmə cəzasına məhkum edilib.
Daha sonra o, cinsiyyətinin kişidən qadına dəyişdirilməsi ilə bağlı rəsmi müraciət edib.
Liebix 2025-ci il avqustun 29-da Kemnits şəhərində yerləşən qadın həbsxanasında cəzasını çəkməyə başlamalı idi. Lakin o, gizlənib və bu ilin aprel ayında Çexiyada saxlanılaraq Plzen-Bori həbsxanasına yerləşdirilib.
Məhkəmədə Liebix Almaniyada kişi həbsxanasına göndərilə biləcəyindən və həyatına təhlükə yaranacağından ehtiyat etdiyini bildirib. Lakin şikayət təmin olunmayıb.
Qərara əsasən, o, yaxın on gün ərzində Çexiya–Almaniya sərhədində Almaniya hüquq-mühafizə orqanlarına təhvil veriləcək və daha sonra Kemnitsdəki qadın cəzaçəkmə müəssisəsinə göndəriləcək.
Xuraman Etibarlı
İnterpress.az
