Azərbaycanın bütün beynəlxalq hava limanlarında gələn sərnişinlər üçün viza rəsmiləşdirmə mərkəzləri fəaliyyətə başlayacaq. Mərkəzlər 2016-cı il fevralın 1-dən etibarən işləyəcək.
“Azərbaycan Hava Yolları” QSC-nin mətbuat xidmətindən bildirilib ki, Fars Körfəzi (Qətər, Oman, Səudiyyə Ərəbistanı, Bəhreyn, Küveyt) ölkələrinin, habelə Yaponiya, Çin, Koreya, Malayziya və Sinqapur vətəndaşları ölkədə 30 günlük birdəfəlik vizanı rəsmiləşdirə biləcəklər.
Ötən ilin noyabr ayından Birləşmiş Ərəb Əmirliklərinin (BƏƏ) vətəndaşlarına Azərbaycana sadələşdirilmiş viza rejimindən istifadə etməklə gəlmək şansı verilib.
Məlumata əsasən, BƏƏ vətəndaşları artıq Azərbaycana gəldikdən sonra ölkənin istənilən aeroportunda viza əldə edə biləcəklər.
Vizanın etibarlılıq müddəti 30 gün təşkil edəcək.
Hazırda Azərbaycanda Bakı, Naxçıvan, Gəncə, Lənkəran, Zaqatala və Qəbələ olmaqla beynəlxalq sərnişin daşımalarını həyata keçirən altı aeroport fəaliyyət göstərir.
İnterpress.az
