Jurnalistlərin peşə fəaliyyətinə zor tətbiq etmək və ya zor tətbiq etməklə hədələmək yolu ilə mane olanlara qarşı cərimələrin 100-500 manatdan 500-1000 manata qədər yüksəldilməsi nəzərdə tutulur. Maraqlıdır, qanunvericilikdə belə bir dəyişikliyin tətbiqi jurnalistlərə qarşı zorakılıq hallarının sayını azalda, bu sahədə vəziyyəti qismən də olsa yaxşılaşdıra bilərmi?
İnterpress.az xəbər verir ki, Moderator.az-a açıqlama verən Ayna.az saytının baş redaktoru, media mütəxəssisi Elçin Şıxlı təklif edilən dəyişikliyi təqdir etsə də, bunun ciddi dəyişikliyə səbəb olmayacağını vurğuladı:
“Təbii ki, bu dəyişiklik müsbət addım kimi təqdir olunmalıdır. Bildiyiniz kimi, son vaxtlar KİV haqqında qanuna bir sıra dəyişikliklər edildi. Hansı ki, bu dəyişiklikərin əksəriyyəti jurnalistlərin informasiya əldə etmək və s. hüquqlarının məhdudlaşdırılması ilə bağlı olub. Bu baxımdan qeyd etdiyiniz dəyişikliyin reallaşması müsbət olardı. Lakin bunun məlum müstəvidə köklü dəyişikliyə səbəb olacağını düşünmürəm. Hesab edirəm ki, ölkədə jurnalist peşəsinə hörməti artırmaq üçün ciddi addımlar atılmalıdır”.
İnterpress.az
