2019-cu ildə həyata keçiriləcək qəbul qaydalarına əsasən, ali təhsil müəssisələrinin ixtisas qrupları üzrə qəbul imtahanlarında imtahan fənlərinin sayı 5-dən 3-ə endiriləcək və buraxılış imtahanlarının nəticələri ali təhsil müəssisələrinə qəbul zamanı nəzərə alınacaq. Və bu zaman 700 ballıq sistem saxlanılacaq.
Yeni model barədə ümumi məlumat verilsə də, bir çox məsələlər, o cümlədən, hər fənndən nisbi balın nə qədər olacağı açıqlanmayıb.
O zaman yeni modelin bütün detalları nə zaman açıqlanacaq?.
Dövlət İmtahan Mərkəzinin mətbuat xidmətinin rəhbəri Xanlar Xanlarzadə Modern.az-a açıqlamasında deyib ki, hazırda yeni modelin üzərində iş gedir.
“Artıq yeni test modelinin ilk variantı ictimaiyyətə məlumdur. Hazırda həmin modelin üzərində araşdırma gedir. Bizdə fənn seminarları təşkil olunub. Həmin seminarlarda modellər müzakirə olunur, təkliflər irəli sürülür. Bu işlərin hamısı yekunlaşandan sonra artıq konkret olaraq qərar qəbul olunacaq. Hazırda ekspertlər öz təkliflərini verirlər. Ondan sonra isə yeni imtahan modeli qanunvericilikdə təsdiq olunacaq”.
Xatırladaq ki, yeni qaydalara əsasən, 2019-cu ildən tam (11 illik) orta təhsil səviyyəsi üzrə yekun qiymətləndirilmə (buraxılış) imtahanları bir mərhələdə – tədris dili, riyaziyyat, xarici dil fənləri üzrə keçiriləcək. Bu mərhələdə şagirdlərin bilikləri yeni təhsil proqramları (kurrikulum) əsasında, tələb olunan bacarıq və vərdişlərin yoxlanılması üçün açıq və qapalı tipli tapşırıqlardan istifadə olunmaqla qiymətləndiriləcək.
Ali təhsil müəssisələrinin bakalavriat səviyyəsinin I-IV qrup ixtisaslarına qəbul olmaq istəyən abituriyentlər aşağıdakı fənlərdən imtahan verəcəklər:
I qrup II qrup III qrup IV qrup
Riyaziyyat Riyaziyyat Azərbaycan dili (rus dili) Kimya
Fizika Coğrafiya Tarix ( Azərbaycan və Dünya tarixi ) Fizika
Kimya Tarix (Azərbaycan və Dünya tarixi) Ədəbiyyat Biologiya
İnterpress.az
