Banqladeşin cənub-şərqində musson yağışlarının yaratdığı daşqınlarda ölənlərin sayı 57-yə yüksəlib.
Bu barədə İnterpress.az xarici mediaya istinadən xəbər verir.
Banqladeş rəsmiləri avqustun 4-11-də ölkənin dörd böyük bölgəsində ümumilikdə 57 nəfərin öldüyünü açıqlayıb.
Meteoroloqlar yağışların daha 2 gün davam edəcəyi və çaylarda daşqınların ola biləcəyi barədə xəbərdarlıq edib.
Banqladeş Fəlakət İdarəsi Nazirliyindən verilən açıqlamada, musson yağışlarının səbəb olduğu daşqınlardan təxminən 1 milyon insanın zərər çəkdiyi bildirilib.
Qeyd olunub ki, daşqınlar nəticəsində çoxlu torpaqlar və yüzlərlə ev zərər görsə də, dəymiş ziyanın qiymətləndirilməsi bir həftədən çox çəkə bilər.
Banqladeşdə ümumiyyətlə iyun-sentyabr aylarında müşahidə edilən musson yağışları səbəbindən hər il minlərlə insanın həyatı mənfi təsirlənir.
Daşqından zərər çəkmiş ərazilərdə axtarış-xilasetmə işləri davam edir.
