“Nova” musiqi festivalında baş vermiş faciənin araşdırılması zamanı kritik səhvlər müəyyən edilib.
İnterpress.az xəbər verir ki, bu barədə “Ynet” məlumat yayıb.
Təqaüddə olan briqada generalı Mizrahinin rəhbərlik etdiyi istintaq qrupu 7 oktyabr 2023-cü ildə “Nova” musiqi festivalına HƏMAS yaraqlılarının hücumu ilə bağlı hesabat təqdim edib.
Sənəddə kütləvi insan tələfatına səbəb olan təhlükəsizlik uğursuzluqları təfərrüatları verilir.
Hücum zamanı hadisə yerində və əsirlikdə olanlar da daxil olmaqla 397 nəfər həlak olub. Daha 44 nəfər qaçırılıb. İstintaq tədbirdə mühafizənin zəif təşkil edildiyini müəyyən edib. 106 mühafizəçidən yalnız 31-də tapança olub ki, bu da onlara yaraqlılara ciddi müqavimət göstərməyə imkan vermirdi. İsrail ordusu təhlükəsizlik planını təsdiq etməli olsa da, festivalın hazırlanmasında iştirak etməyib. Mümkün təhlükə barədə kəşfiyyat məlumatlarına məhəl qoyulmayıb və təhlükəsizliyin artırılması məsələsi belə gündəmə gətirilməyib.
Hadisələr xaotik şəkildə cərəyan edib. Polis minlərlə insanın həyatını xilas edən təcili evakuasiya qərarı verib, lakin ordu ilə polis arasında praktiki olaraq heç bir koordinasiya olmayıb.
Nəticədə İsrail ordusunun ilk dəstəsi faciə yerinə hücum başlayandan cəmi 5 saat sonra, qırğın artıq başa çatan zaman gəlib.
Müstəntiqlər müəyyən ediblər ki, festivala hücum əvvəlcədən planlaşdırılmayıb. Yaraqlılar əvvəlcə başqa əraziyə yollanıblar, lakin yollarını azaraq festival iştirakçılarının üzərinə düşüblər. Buna baxmayaraq, zəif təhlükəsizlik, hərbi patrulların olmaması və təhlükəsizlik qüvvələrinin gecikmiş reaksiyası İsrail tarixinin ən pis faciələrindən birinə gətirib çıxarıb.
Xuraman Etibarlı
İnterpress.az
