Almaniyada qasırğadan sonra alovla “döyünən” ağacın görüntüləri yayılıb.
İnterpress.аz xəbər verir ki, bu barədə xarici KİV məlumat yayıb.
Almaniyada təbiət fəlakətindən sonra olduqca qeyri-adi və heyrətamiz mənzərə lentə alınıb.
Şəhərdə baş verən güclü fırtına zamanı yüksək gərginlikli elektrik xətti qoparaq yaxınlıqdakı böyük ağacın üzərinə düşüb.
Elektrik naqillərindən ötürülən müntəzəm qısaqapanma və elektrik boşalmaları səbəbindən ağacın gövdəsindəki alov periodik olaraq yanıb-sönməyə başlayıb.
Bu isə vizual olaraq ağacın daxildən alovla pulsasiya etməsi effektini yaradıb.
Hadisə yerinə dərhal xilasedicilər və elektrik şəbəkəsinin əməkdaşları cəlb olunub. Xətdəki gərginlik tamamilə kəsildikdən sonra yaranan alov təhlükəsiz şəkildə söndürülüb.
Sosial şəbəkələrdə sürətlə yayılan bu maraqlı və fərqli görüntülər izləyicilərin böyük marağına səbəb olub.
Xuraman Etibarlı
İnterpress.аz
