Türkiyənin internet reklam bazarının ümumi gəlirləri 2022-ci ildə 1,6 milyard dollara çatıb və bu gəlirlərin 2027-ci ilə qədər 8,6 faiz mürəkkəb illik artım tempi ilə artaraq 2,3 milyard dollara çatacağı gözlənilir.
Bu barədə İnterpress.az xarici mediaya istinadən xəbər verir.
PwC Qlobal Əyləncə və Media Sənayesi Görünüşü 2023-2027 hesabatını dərc edib.
Bu il 24-cü buraxılışı hazırlanan hesabata görə, qlobal əyləncə və media sənayesinin ümumi gəliri 2022-ci ildə 5,4 faiz artaraq 2,3 trilyon dollara çatıb.
Bu nisbət Covid-19 epidemiyasından sonra iqtisadiyyatların bərpa olunmağa başladığı 2021-ci ildə qeydə alınan 10,6 faizlik artımla müqayisədə yavaşladığını göstərir.
PwC-nin 53 regionda 13 əyləncə və media seqmentini əhatə edən Qlobal Əyləncə və Media Sənayesi 2023-2027-ci illər üzrə araşdırmasına reklam verənlərin və istehlakçıların media xərclərinin təhlili və növbəti 5 il üçün proqnozlar daxil edilib.
Araşdırmaya görə, internet reklamı yüksəlişini davam etdirərkən, oyun sənayesi də güclü böyümə potensialı ilə diqqət çəkir. Texnologiya sənayenin ən mühüm hərəkətverici qüvvələrindən biri kimi önə çıxsa da, generativ süni intellekt və metaverse əyləncə və media təcrübəsini dəyişdirərək yeni imkanlar təqdim edir.
Açıqlamada fikirləri yer alan PwC Türkiyə Əyləncə və Media Sektoru Lideri Murat Çolakoğlu PwC-nin ənənə halını almış və sektor tərəfindən hər il maraqla izlənilən Qlobal Əyləncə və Media Sektoruna Baxış hesabatının dərin bir perspektiv təqdim etdiyini söyləyib.
Əyləncə və media sektorunda gözləntilərin necə yenidən formalaşacağı, böyümənin necə olacağı ilə bağlı da bu kursu izləyəcəyini açıqlayıb.
