Ümumdünya Səhiyyə Təşkilatı (ÜST) hazırkı COVID-19 peyvəndlərinin təhlükəsiz və təsirli olduğunu açıqlayıb.
Bu barədə İnterpress.az xarici mediaya istinadən xəbər verir.
ÜST-nin baş direktoru Tedros Adhanom Ghebreyesus ÜST-nin həftəlik mətbuat konfransında cari sağlamlıq problemlərini qiymətləndirib.
Şimal yarımkürəsində qış mövsümündən əvvəl COVID-19 ilə bağlı narahatedici tendensiyaları görməyə davam etdiklərini ifadə edən Qebreyesus son 28 gündə xüsusilə Avropa və ABŞ-da COVID-19 səbəbiylə xəstəxanaya yerləşdirmə və reanimasiyaya müraciətlərin artdığını söyləyib.
Qebreyesus COVID-19-a qarşı peyvəndin ən çox risk altında olan insanlar üçün aşağı səviyyədə qaldığını, dünya əhalisinin 2/3-nin peyvəndin ilk dozasını aldığını, lakin yalnız 1/3-nin gücləndirici doza aldığını bildirib.
“COVID-19 2 il əvvəlki kimi kəskin böhran olmaya bilər, lakin bu, bizim buna məhəl qoymayacağımız anlamına gəlmir” deyən Qebreyesus, ölkələrin COVID-19 ilə mübarizə üçün çoxlu sərmayələr yatırdıqlarını və bununla bağlı tədbirləri davam etdirməli olduqlarını vurğulayıb.
Dağıdıcı selin yaşandığı Liviyada böhranın davam etdiyini bildirən Qebreyesus bildirib ki, Liviyada rəsmi olaraq 4 mindən çox adam ölüb, 8 min 500-dən çox insan itkin düşüb, 30 mindən çox insan isə qaçqın düşüb.
Qebreyesus qeyd edib ki, Liviyanın səhiyyə müəssisələrinin və xəstəxanalarının yalnız 3-də 1-i struktur zədələnməsi, dərman və tibbi avadanlıqların olmaması və tibb işçilərinin qeyri-kafi olması səbəbindən işlək vəziyyətdədir.
ÜST-nin Liviyada yerli hakimiyyət orqanları ilə əməkdaşlıq etdiyini bildirən Qebreyesus, onlara dəstək olmaq üçün ÜST-nin təcili yardım fondundan 2,3 milyon dollar ayırdıqlarını və 11 milyon dollar dəyərində yardım çağırışı başlatdıqlarını bildirib.
