YAP-da Əli Əhmədov dövranı bitdi? – Partiyadakı “təmizləmənin” pərdəarxasıbackend

YAP-da Əli Əhmədov dövranı bitdi? – Partiyadakı “təmizləmənin” pərdəarxası

  • whatsapp
  • messenger
  • telegram
  • vkontakte
  • odnoklassniki

Hakim Yeni Azərbaycan Partiyasının adı ətrafında növbəti dəfə ajiotaj yaranıb. Partiya funksionerlərinin intim videolarının yayılmasının ardından İdarə Heyətinin təcili toplanaraq yeni qərarlar qəbul etməsi müxtəlif mülahizələrin meydana çıxmasına səbəb olub: Hazırda siyasi analitiklər bu suallara cavab axtarışındadır: YAP-da nə baş verir? İqtidar partiyasının nüfuzdan düşməsi kimə sərf edir? 

Yenisabah.az xatırladır ki, sentyabrın 10-da YAP-ın İdarə Heyətinin iclası keçirilib. İclasda hakim partiyanın Bakı şəhərində fəaliyyət göstərən 9 rayon təşkilatının sədri vəzifəsindən azad edilib, onların yerinə yeni təyinatlar olub. Nəticədə Səbail rayon təşkilatının sədri, keçmiş deputat Şəmsəddin Hacıyev, Yasamal rayon təşkilatının sədri Tağı Əhmədov, Nəsimi rayon təşkilatının sədri, deputat Məlahət İbrahimqızı, Qaradağ rayon təşkilatının sədri, deputat Aydın Hüseynov, Nizami rayon təşkilatının sədri, deputat Sədaqət Vəliyeva, Binəqədi rayon təşkilatının sədri Ramiz Göyüşov, Pirallahı rayon təşkilatının sədri Hikmət Şikarov, Nərimanov rayon təşkilatının sədri Təmraz Tağıyev və Sabunçu rayon təşkilatının sədri Mehriban Abasquliyeva partiyadakı vəzifələrini itiriblər.

Aldığımız məlumatlara görə, YAP-dakı yeniliklər təkcə nizamnamə dəyişikliyilə bağlı deyil. Adının çəkilməsini istəməyən partiya funksionerinin sözlərinə görə, əslində, nizamnamə dəyişikliyində məqsəd YAP-da “təmizləmə əməliyaytı”nın keçirlməsi üçün zəmin hazırlamaq olub. Onun sözlərinə görə, hakim partiya “arzuolunmaz” şəxslərlə vidalaşmaqda israrlıdır. Müsahibimiz illərlə partiya üçün faydalı olmayan lakin vəzifə tutan stajlı YAP-çıların bir çoxunun tezliklə “qapı arxasında” qalacağını bildirib.

Mənbə deyib ki, YAP-da vəzifəsini itirən şəxslərin əksəriyyəti Əli Əhmədovun kadrlarıdır. Bunda məqsəd Əli Əhmədovun partiyadakı hegemonluğuna son qoymaqdır. Həmsöhbətimizin bildirdiyinə görə, bu proses Tahir Budaqovun YAP-da ikinci posta gətirilməsi ilə başlayıb. Hazırda Budaqov partiyada Əli Əhmədovun “qol-budağını” kəsməklə məşğuldur.

YAP funksioneri Əli Əhmədovun “qara siyahıya” düşməsinin səbəbini də açıqlayıb. Qeyd edib ki, Baş nazirin müavini uzun illər partiyada əsas söz sahibi olmasından istifadə edərək, böyük bir qruplaşma yaratmağa nail olub. Onun qruplaşmasından kənarda qalanların karyerası heç də hamar olmayıb. Əhmədov xüsusilə partiyanın deputat siyahısı müəyyənləşərkən şəxsi münasibətləri və namizədlərin regional mənsubiyyətini əsas götürüb. 2020-ci ilin fevralında keçirilən sonuncu parlament seçkiləri zamanı bu problem özünü daha qabarıq şəkildə göstərdiyi üçün Əl Əhmədovun partiyadakı mövqelərinin zəiflədilməsinə qərar verilib. Belə demək mümkündürsə, Əli Əhmədov ifrat yerlibazlığın güdazına gedib.