İyulun 6-da “Azərkitab” kitab təbliğat mərkəzinin konfrans salonunda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Mədəniyyətin və Milli Ənənələrin Təbliği” İctimai Birliyinin (İB) ekranlaşdırdığı “Soyqırımı: 100 il” sənədli filminin təqdimat mərasimi keçirilib.
İnterpress.az xəbər verir ki, mərkəzdən bildirilib ki, mərasimi layihənin rəhbəri İB-nin sədri Büllur Məmmədova filmin əhəmiyyətindən söz açıb. Bildirib ki, film daşnakların azərbaycanlılara qarşı soyqırımı cinayəti törətməsinin 100-cü ildönümünə həsr edilib.
Vurğulanıb ki, “Soyqırımı: 100 il” sənədli filmi yalan üzərində qurulmuş erməni təbliğatına növbəti ağır zərbədir. Təşkilat sədrinin sözlərinə görə, növbəti mərhələdə sənədli filmin xarici dillərə dublyaj olunaraq xarici ölkələrə yayılması planlaşdırılır.
“Soyqırımı: 100 il” sənədli filminin nümayişindən sonra ssenari müəllifi və rejissoru Etibar Məmmədov vurğulayıb ki, təqdim olunan ekran əsərində yalnız arxiv sənədlərdən, Fövqəladə İstintaq Komissiyasına ifadələr vermiş 1918-ci ilin mart-aprel hadisələrinin canlı şahidlərinin sözlərindən istifadə olunub.
Tədbir film ətrafında geniş müzakirələrin aparılması ilə davam edib.
İnterpress.az
