Bu gün UEFA Gənclər Liqasında “Qəbələ”nin rəqibləri müəyyənləşəcəkbackend

Bu gün UEFA Gənclər Liqasında “Qəbələ”nin rəqibləri müəyyənləşəcək

  • whatsapp
  • messenger
  • telegram
  • vkontakte
  • odnoklassniki

İnterpress.az xəbər verir ki, İsveçrənin Nyon şəhərində Bakı vaxtı ilə saat 16:00-da start götürəcək mərasimdə AFFA-nın təşkil etdiyi Gənclər Liqasının qalibi qismində turnirə vəsiqə qazanan “Qəbələ”nin də rəqibləri müəyyənləşəcək.

Əsasnaməyə uyğun olaraq, yarışa UEFA-nın reytinqində ilk 32 pillədə qərarlaşan milli assosiasiyaların təşkil etdikləri Gənclər Liqasının qalibləri qatılır. Lakin Lixtenşteyndə analoji yarış keçirilmədiyi üçün vakant yer 33-cü sıradakı Moldovaya verilib.

Həmçinin “Atalanta” (İtaliya), “Borussiya” (Dortmund, Almaniya), “Lokomotiv” (Moskva, Rusiya), “Genk” (Belçika), “Qalatasaray” (Türkiyə), “Zaltsburq” (Avstriya), “Dinamo” (Zaqreb, Xorvatiya), “Ayaks” (Hollandiya) və “Slaviya” (Çexiya) klublarının əsas komandaları Çempionlar Liqasının qrup mərhələsinə vəsiqə qazandıqları üçün onların gənclərdən ibarət kollektivləri Gənclər Liqasında Çempionlar Liqası Yolunda çıxış edəcəklər.

Bu komandaları isə reytinqdə müvafiq olaraq, növbəti sıralarda qərarlaşan ölkələrin – Albaniya, İslandiya, Makedoniya, Finlandiya, İrlandiya, Bosniya və Herseqovina, Latviya və Estoniya çempionları əvəzləyib.

Beləliklə, Çempionlar Yolunda “Qəbələ” ilə yanaşı, “Saraqosa” (İspaniya), “Derbi” (İngiltərə), “Renn” (Fransa), “Portu” (Portuqaliya), “Yanq Boyz” (İsveçrə), PAOK (Yunanıstan), “Midtyulland” (Danimarka), “Makkabi” (Petah-Tikva, İsrail), APOEL (Kipr), “Viitorul” (Rumıniya), “Korona” (Polşa), “Elfsborq” (İsveç), “Lüdoqorets” (Bolqarıstan), “Brodarats” (Serbiya), “Reyncers” (Şotlandiya), “Minsk” (Belarus), “Astana” (Qazaxıstan), “Soqndal” (Norveç), “Domjale” (Sloveniya), “Slovan” (Bratislava, Slovakiya), “Şerif” (Moldova), “Şkendiya” (Albaniya), “Akranes” (İslandiya), MTK (Macarıstan), “Şkendiya” (Makedoniya), “Honka” (Finlandiya), “Bohemians” (İrlandiya), “Zrinski” (Bosniya və Herseqovina), “Liepaya” (Latviya) və “Levadiya” (Estoniya) mübarizə aparacaq.

Komandaları coğrafi prinsiplərə əsasən, 4 səbətə bölüb. Beləliklə, “Qəbələ”nin potensial rəqiblərinin sayı 7-yə enib. “Qırmızı-qaralar” püşkatmada “Saraqosa” (İspaniya), APOEL (Kipr), “Korona” (Polşa), “Şerif” (Moldova), “Şkendiya” (Albaniya), MTK (Macarıstan) və “Zrinski” (Bosniya və Herseqovina) ilə birgə 1-ci səbətdə yer alıb. Yəni, əyalət təmsilçisi I və II mərhələdə bu komandalarla rəqib ola bilər.

Reqlamentə əsasən, Çempionlar Liqası Yolunda qrup qalibləri birbaşa 1/8 finala yüksələcəklər. Çempionlar Yolunda I mərhələnin oyunları 2 – 23 oktyabrda, II raundun görüşləri isə 6 – 27 noyabrda olacaq. İki mərhələnin yekununda yoluna davam edəcək 8 komanda pley-offda Çempionlar Liqası Yolunun qruplarında 2-ci yeri tutan 8 kollektiv ilə üz-üzə gələcək. Pley-off oyunları 11 – 12 fevralda, 1/8 final matçları 3 – 4 martda, 1/4 final görüşləri isə 17 – 18 martda keçiriləcək. Yarımfinal ilə final matçları müvafiq olaraq aprelin 17-də və 20-də Nyonda baş tutacaq. Bu mərhələlərdə qaliblər bir oyunla müəyyənləşəcək.

Qeyd edək ki, “Qəbələ” ardıcıl üçüncü dəfə Gənclər Liqasında çıxış edəcək. “Qırmızı-qaralar” 2016/2017 və 2017/2018 mövsümlərində də yarışa AFFA-nın təşkil etdiyi Gənclər Liqasının qalibi kimi qatıb. Əyalət təmsilçisi ilk cəhddə I mərhələdə Rusiyanın “Dinamo” (Moskva) komandasına uduzub – 0:2, 0:5. Ötən mövsüm isə I mərhələdə Moldova \”Şerif\”ini iki oyunun nəticəsində üstələyib – 1:1, 3:1. Ancaq II raundda Almaniya “Herta”sına evdə 1:3, səfərdə isə 0:1 hesabı ilə uduzaraq mübarizəni dayandırıb.

İnterpress.az