Tbilisidə Mirzə Fətəli Axundov adına Azərbaycan Mədəniyyəti Mərkəzində İrandan olan Borçalı əsilli Nevid Müsmirin konsert proqramı təqdim olunub. İnterpress.az xəbər verir ki, musiqiçi sazda Füzüli, Nəsimi, Seyid Əzim Şirvaninin qəzəlləri, Zəlimxan Yaqubun şeirlərinə bəstələdiyi mahnıları ifa edib. Aşıq Ələsgər, Aşıq Veysəlin yaradıcılığına da müraciət edən Nevid Müsmirin mahnıları tamaşaçılarda xoş ovqat yaradıb. Aşıq Nargilə Mehtiyevanın təşəbbüsü, muzeyin dəstəyi ilə baş tutmuş konsert proqramı rəğbət və alqışlarla qarşılanıb. Sonda Nevid Müsmir və Nargilə Mehtiyeva 29 oktyabr – Türkiyənin Cümhuriyyət Bayramı münasibətilə “Çırpınırdı Qara dəniz” mahnısını birgə ifa ediblər. M.F.Axundov adına Azərbaycan Mədəniyyəti Muzeyinin direktor müavini Leyla Əliyeva musiqiçiyə konsertə görə təşəkkürünü bildirib, muzeyin adından xatirə hədiyyələri təqdim edib. Musiqiçi Nevid Müsmir isti qarşılanmaya və qonaqpərvərliyə görə minnətdarlığını bildirib.
