Tramp İranın elektrik stansiyalarına və körpülərinə yeni zərbələr endirmək əmrinə yaxın olduğunu bəyan edib.
İnterpress.az xəbər verir ki, bu barədə “Fox News” telekanalı məlumat yayıb.
ABŞ Prezidenti Donald Tramp Vaşinqton və Tehran arasında artan hərbi-siyasi gərginlik fonunda olduqca sərt bəyanatla çıxış edib.
Ağ Ev rəhbəri İranın elektrik stansiyalarına, enerji infrastrukturuna və strateji əhəmiyyətli körpülərinə qarşı yeni hərbi zərbələrin endirilməsi barədə əmr verməyə çox yaxın olduğunu bildirib.
Tramp bu addımın ABŞ-nin milli təhlükəsizliyini təmin etmək və regionda İranın hərbi təhdidlərinin qarşısını almaq məqsədi daşıdığını vurğulayıb.
Analitiklər qeyd edirlər ki, ABŞ Prezidentinin bu hədələri Hürmüz boğazı yaxınlığında ABŞ-yə məxsus “Apache” helikopterinin İran dronu ilə toqquşması iddialarından və tərəflər arasında hərbi gərginliyin pik həddə çatmasından sonra səsləndirilib.
Rəsmi Vaşinqton hərbi variantların hər an masada olduğunu və İrana qarşı daha sərt addımların atıla biləcəyini dəfələrlə bəyan edib.
Hazırda ABŞ ordusunun Yaxın Şərqdəki komandanlığı mümkün əməliyyat ssenarilərini nəzərdən keçirir.
Xuraman Etibarlı
İnterpress.az
