Şəxsi təhlükəsizlik şirkətləri Qəzzada Netsarim dəhlizinin keçid məntəqəsinə nəzarət edəcək.
İnterpress.az xəbər verir ki, bu barədə “Axios” İsrail rəsmilərinə istinadən məlumat yayıb. Bildirilir ki, ABŞ və Misirin özəl təhlükəsizlik şirkətləri yaxın günlərdə Qəzza zolağının şimalını qalan hissədən ayıran Netsarim keçid məntəqəsində işə başlayacaq.
Şirkətlər atəşkəs razılaşması əsasında yaradılan çoxmillətli konsorsiumun bir hissəsi kimi fəaliyyət göstərəcək.
Podratçıların rolu Qəzzanın cənubundan şimala doğru hərəkət edən Fələstin avtomobillərini yoxlamaq və onların raket və ya digər ağır silahlar daşımamasını təmin etmək olacaq.
Konsorsium üç özəl şirkətdən ibarətdir: ABŞ-də yerləşən Safe Reach Solutions və UG Solutions və Misirin kəşfiyyat xidmətindən icazə almış Misir təhlükəsizlik şirkəti.
Şirkətlərin atəşkəs razılaşmasının birinci mərhələsi başa çatana qədər Qəzza zolağında fəaliyyət göstərəcəyi gözlənilir.
Xuraman Etibarlı
İnterpress.az
