“Azərbaycan hərbiçisi öz torpaqlarımızda, sadəcə, Rusiya sülhməramlılarının müvəqqəti nəzarətində olan ərazidə saxlanıb. Bu da sülhməramlıların işinin icrasını şübhə altına alır”. bunu Milli Məclisin deputatı Eldar Quliyev Azərbaycan hərbçisinin Rusiya sülhməramlılarının nəzarətində olduğu Ağdərədə erməni separatçıları tərəfindən əsir götürülməsinə münasibət bildirərkən deyib.
Deputat bildirib ki, Azərbaycan hərbiçisinin qaytarılması ilə bağlı tədbir görmək lazımdır: “İki gündür ki, Rusiya sülhməramlılarının müvəqqəti nəzarətində olan hissəyə keçən Azərbaycan hərbçisinin saxlanılması xəbərlərini izləyirəm. Müəmmalı məsələdir. Sual yaranır ki, həmin hərbçi Gəncədən Ağdərə istiqamətinə qədər necə gedə bilib? Yəni, uzun məsafədir axı. Əsas məsələ hərbçinin geri qaytarılmasıdır. Mütləq tədbir görmək və müddətdən artıq hərbi xidmətdə qulluq edən hərbçini geri qaytarmaq lazımdır. Nəzərə almaq lazımdır ki, o, öz ərazilərimizdə saxlanılıb. Erməni tərəfi yazır ki, guya onu ermənilərə Rusiya sülhməramlıları təhvil verib. Rusiya isə hərbçini görmədiklərini iddia edirlər. Yəni, hələ aydınlıq gətirilməsi lazım olan məqam çoxdur. Qaldı ki, müdafiə nazirliyinin hərbçini məsuliyyətə cəld edəcəyi ilə bağlı açıqlamasına, düşünürəm ki, ilk növbədə Azərbaycana qaytarılmasını tələb etməliyik. Bilmirik, sağ-salamatdır, vəziyyəti necədir? Deyirlər, onun müəyyən əqli problemləri var. Hamısı Ermənistanın oyunudur. Deyirdilər ermənilər Qarabağı boşaldır, nə oldu bəs? Ağdərədə, öz torpaqlarımızda hərbçimizi ələ keçirirlər. Ermənistanın müharibə etməyə onsuz da gücü yoxdur, amma beynəlxalq təşkilatları ayağa qaldırmaq istəyir. Anlamır ki, bizim müharibə etməyə kifayət qədər gücümüz var. Sadəcə, Ermənistan yalvardı, Rusiya razılıq verdi və 2020-ci ilin 10 noyabr bəyannaməsi imzalandı. İndi isə tərəflər bəyanatı icra etməlidirlər”.
Qeyd: Azərbaycan Ordusunun müddətdən artıq xidmət edən hərbi qulluqçusu Cəmil Babayev Qarabağda Rusiya sülhməramlılarının müvəqqəti nəzarət etdiyi ərazidə erməni separatçıları tərəfindən əsir götürülüb. Azərbaycan Müdafiə Nazirliyinin məlumatına görə, C.Babayev Gəncə hospitalının psixiatriya bölməsini özbaşına tərk edib. Bu səbəbdən onun haqqında cinayət işi başlanılıb, araşdırma aparılır./Pravda.az
