XX əsrin sonlarında SSRİ-nin dağılması ilə yaranan tarixi şərait nəticəsində Azərbaycan öz müstəqilliyini ikinci dəfə yenidən bərpa etdi.
Bu gün bu tarixi günü tam fərqli hiss edirik; günün mövzusunu- 18 oktyabra həsr etdiyim bu yazını daha qürurla, sahib olduğumuz gücün fərqinə vararaq yazacağam. Axı bu gün biz fərqliyik, bu gün biz bütünük, bu gün müstəqilliyimizin “Qarabağ” dərdi yoxdur, tariximiz bərpa olunub, torpaq yarasından azad olmuşuq. Bu gün bir ayrı gündür…
Azərbaycan xalqı 1991-ci ildən sonra ilk dəfə bu bayramı öz ərazi bütövlüyünü bərpa etmiş qalib xalq kimi qeyd edir..Azərbaycan xalqı 30 illik vətən həsrətindən sonra, nəhayət ki, Qarabağda qəhrəman bir savaşla, misli görünməmiş bir şücaətlə tarixi zəfər qazandı, işğal tarixinə son qoydu. Qələbimizlə meydan oxuyuruq daha, nə xoş “azərbaycanlıyam”deyənə…
Müzəffər Ordumuzun sentyabrın 27-dən başlayan davamlı hərbi qələbələri- cəmi 44 günlük İkinci Qarabağ müharibəsini şanlı qələbə ilə başa vurmağımız və Ermənistanın faktiki təslim olması bunun bariz nümunəsidir.
Bu gün böyük iftixar hissi ilə deyə bilərik ki, biz artıq tam olaraq azadıq, güclüyük, öz sözümüzü bütün dünyaya deyə bilirik. Müstəqillik düşüncəmizdə də tam olaraq bütünləşib, artıq sorğusuz, sualsız, rahat yata bilirik. Başımızı dik tuturuq daha, sərkərdəmizin əzmi ilə, vətən sevgisindən doğan qabaqcıl siyasəti ilə, mərd oğullarımızın şücaəti və qəhrəmanlığı sayəsində fəxarətlə deyə bilirik; Azərbaycanın dövlət müstəqilliyi əbədidir, daimidir.
Günün mübarək, Vətən…
Günün mübarək, Ali Baş Komandanımız.
Günün mübarək, şəhidim.
Günün mübarək, müstəqilliyimizdə əməyi keçən bütün müharibə iştirakçıları.
Günün mübarək, artıq evində rahat yatan millətim.
Allah bir daha çətin gün yaşatmasın, müstəqil günümüz, bütöv Azərbaycanımız , güclü dövlətimiz əbədi yaşasın.
Gülər Mübariz
