İngiltərədə 300 illik dünyaca məşhur çinar ağacını kəsdiyi üçün saxlanılan 16 yaşlı gənc zaminə buraxılıb.
Bu barədə İnterpress.az xarici mediaya istinadən xəbər verir.
Ölkə mətbuatında yer alan xəbərə görə, sentyabrın 27-nə keçən gecə Northumberland bölgəsindəki Hadrian divarı yaxınlığında “Çinar boşluğu” adlı tarixi ağacın kəsilməsi nəticəsində 16 yaşlı şübhəli saxlanılıb.
Northumbria Polisi şübhəlinin zaminə buraxıldığını və istintaqın davam etdiyini açıqlayıb.
Səlahiyyətlilər hadisədən rayon sakinlərinin çox kədərləndiklərini bildiriblər.
Mütəxəssislər 2016-cı ildə “Woodland Trust” mükafatlandırma mərasimində “Britaniyada ilin ağacı” seçilən çinarın xilas edilməsinin çətin olduğunu bildirsələr də, bəziləri cücərtilərin çıxma ehtimalının olduğu fikrini bölüşürlər.
Səlahiyyətlilər qeyd edib ki, hər il bir çox yerli və xarici insan ağacın fotoşəkillərini çəkmək üçün bölgəyə gəlir.
İngiltərədə təbii irsin qorunması ilə məşğul olan bir təşkilat olan National Trust, ağacın 1860-1890-cı illər arasında əkildiyini açıqlayıb.
“Robin Hud ağacı” kimi də tanınan tarixi çinar 1991-ci ildə Kevin Kostner və Morqan Frimanın baş rollarda çəkildiyi Hollivud filmi “Robin Hud: Oğrular şahzadəsi” filmində çəkilib.
