İran əsilli ABŞ vətəndaşı Feramerz Cavidzad saxlandığı Tehranın Evin həbsxanasında dünyasını dəyişib.
Bu barədə İnterpress.az xarici mediaya istinadən xəbər verir.
İran İnsan Haqları Mühafizəçiləri Agentliyinin (HRANA) xəbərində ürək-damar, mədə və şəkər xəstəliyi olan Cavidzadın xəstəliyinə baxmayaraq həbsxana rəhbərliyi tərəfindən xəstəxanaya gec aparıldığı və bu səbəbdən də dünyasını dəyişdiyi iddia edilib.
Tehran Həbsxanalar Baş Müdirliyindən edilən yazılı açıqlamada səhlənkarlıq iddiası təkzib edilib.
İranın rəsmi xəbər agentliyi İRNA-da dərc olunan yazılı açıqlamada deyilir “Cavidzad dərhal xəstəxanaya aparılıb və bütün müdaxilələrə baxmayaraq həyatını itirib”.
Yəhudi dininə mənsub olan Cavidzad 2022-ci ilin martında ABŞ-dan ölkəsinə gələrkən maliyyə cinayətləri səbəbilə saxlanılıb və 3 aylıq təkadamlıq kameradan sonra Tehrandakı Evin həbsxanasına köçürülüb.
