Meksikanın cənubunda immiqrantları daşıyan yük maşınının aşması nəticəsində 10 nəfər ölüb, 15 nəfər yaralanıb.
Bu barədə İnterpress.az xarici mediaya istinadən xəbər verir.
Çiapas əyalət rəsmiləri qəzanın Qvatemala sərhədindən 175 kilometr aralıda, Pijijiapan şəhəri yaxınlığındakı magistral yolda baş verdiyini açıqlayıb.
Səlahiyyətlilər qeyd edib ki, ilkin məlumatlara görə, qəza nəticəsində 10 immiqrant həyatını itirib, 15 nəfər yaralanıb, lakin ölənlərin milliyyəti barədə məlumat verilməyib.
Digər tərəfdən, Associated Press (AP) ilə danışan və əyalət prokurorluğunda işlədiyini bildirən adı açıqlanmayan bir mənbə, ölənlərin yük maşınında avtostop edən Kubalı immiqrantlar olduğunu iddia edib.
Hələlik xəsarət alanların neçəsinin mühacir olduğu, sağlamlıq vəziyyəti və milliyyəti ilə bağlı açıqlama verilmir.
