Suriya dövlət mediası ölkədə hakimiyyət dəyişikliyindən sonra İsrailə qarşı ritorikasını nəzərəçarpacaq dərəcədə yumşaldıb.
İnterpress.az xəbər verir ki, bu barədə Yəhudi Xalq Siyasəti İnstitutunun (JPPI) Qleyzer Mərkəzi yeni araşdırma aparıb.
Keçən ilin dekabrında Bəşər Əsədin devrilməsindən və əl-Şaraanın yüksəlişindən sonra Suriyanın rəsmi nəşrləri “Əl-Təvra” və “Əl-Hurriya” (keçmiş Tişrin) İsrail haqqında əhəmiyyətli dərəcədə az material dərc etməyə başlayıb və onların nəşrlərinin ümumi tonu daha az aqressiv olub.
Müasir süni intellekt vasitələrinin istifadəsinə əsaslanan təhlil 2025-ci ilin yanvarından may ayına qədər dərc olunan yüzlərlə məqalə, rəy və xəbərləri əhatə edib və Əsədin dövründə eyni dövrlə müqayisə edilib.
Tədqiqatın əsas nəticələri:
– Əsəd dövründə verdiyi xəbərlərin 43%-də İsraildən bəhs edən rəsmi SANA xəbər agentliyi əl-Şaraa dövründə bu rəqəmi 7%-ə endirib.
– Əl-Təvra qəzetində İsraillə bağlı fikirlərin payı 25%-dən 5%-ə düşüb. Eyni zamanda, bir il əvvəlki 95% ilə müqayisədə yeni nəşrlərin yalnız 65% -i “son dərəcə mənfi” kimi təsnif edildi.
– Əl-Hurriyada İsrail mövzusuna aid nəşrlərin 78%-i hələ də düşmənçilik mövqeyində idi, lakin indi neytral qiymətləndirmələr ortaya çıxıb – əvvəllər tamamilə olmayan bir ton.
Nəşrlərin ümumi əhval-ruhiyyəsi ehtiyatlı qalsa da, dəyişikliyin istiqaməti göz qabağındadır.
Qleyzer Mərkəzinin direktoru Yaakov Katz izah edib:
“Suriyanın yeni rəhbərliyi Qərblə yaxınlaşmaq üçün ehtiyatlı cəhdlər nümayiş etdirir. Bu, təkcə siyasətdə deyil, xəbər gündəmində də özünü göstərir. Prezident əl-Şaraa və Donald Trampın görüşü və daha sonra ABŞ-nin Suriyaya qarşı sanksiyalarının ləğvi bu kursu təsdiqləyir. Media belə proseslərin güzgüsüdür”.
O vurğulayıb ki, İsrailə qarşı düşmənçilik Suriya ritorikasından itməsə də, əsas mövzu statusunu itirib.
Neytral formaların ortaya çıxması və istinadların həcminin azalması prioritetlərin mümkün dəyişməsindən və Suriyanın yeni rəhbərliyinin regional siyasətə praqmatik yanaşmasından xəbər verir.
Xuraman Etibarlı
İnterpress.az
