QMİ-nin mətbuat xidmətindən verilən məlumata görə, müraciətə imza atan Azərbaycanda fəaliyyət göstərən dini konfessiyaların rəhbərləri Beynəlxalq tolerantlıq günü münasibətilə multikultural ənənələrin və dinlərarası münasibətlərin inkişafındakı xidmətlərə görə yüksək təltifat – “Azərbaycan Respublikası Prezidentinin fəxri diplomu”na layiq görüldükləri üçün dövlət başçısına təşəkkür edib, minnətdarlıqlarını çatdırıblar.
Müraciətdə vurğulanır ki, bu gün sivilizasiyaların qovuşduğu Azərbaycanda təşəkkül tapmış davamlı tolerantlıq mühiti cəmiyyətimizdə milli-mənəvi həmrəyliyi və ictimai-siyasi sabitliyi şərtləndirən tarixi nailiyyətdir. Dinindən, dilindən, milli mənsubiyyətindən asılı olmayaraq Azərbaycanın bütün vətəndaşları ölkəmizdə mövcud olan söz, vicdan və dini etiqad azadlığından, dövlət-din münasibətlərindən və demokratik-hüquqi şəraitdən lazımınca yararlanmaqdadırlar. Dini konfessiyaların rəhbərləri bildiriblər ki, qloballaşma və inteqrasiya proseslərinin geniş vüsət aldığı müasir dünyada eyni zamanda ziddiyyətli proseslər, ayrı-ayrı bölgələrdə milli-mədəni, mənəvi və siyasi qarşıdurmalar, islamofobiya, antisemitizm, ksenofobiya halları da müşahidə olunur: “Təəssüf hissi ilə qeyd etməliyik ki, etnik-siyasi qarşıdurmalar, terrorizm, separatçılıq, dini radikalizm, dindən sui-istifadə edərək münaqişələr yaratmaq kimi bütövlükdə bəşər sivilizasiyasını təhdid edən hadisələr zəmanəmizin bugünkü acı gerçəyidir. Belə vəziyyətdə mədəniyyətlərarası dialoqa, aparıcı dünya dinlərinin həmrəylik və sülh çağırışlarına ciddi ehtiyac vardır. Əminik ki, Heydər Əliyev Fondunun rəhbəri, birinci xanım Mehriban Əliyevanın dəstəyi ilə bizim hər zaman təbliğ etdiyimiz və dünyaya multikulturalizmin nümunəsi kimi təqdim etdiyimiz Azərbaycanın tolerantlıq modeli sivilizasiyalararası dialoqun və mədəni əlaqələrin inkişafına, qarşılıqlı anlaşma və dostluq kimi bəşəri dəyərlərin təşviqinə və təkamülünə öz töhfəsini verməkdədir. Dövlətimizin bütün dini konfessiyalar üçün yaratdığı eyni şəraitin və bərabər münasibətin ən parlaq təzahürlərindən biri də multikultural ənənələrin və dinlərarası münasibətlərin inkişafındakı xidmətlərə görə bizə təqdim etdiyiniz Fəxri Diplomda əksini tapır”.
Dini konfessiyaların rəhbərləri müraciətlərində ümidvar olduqlarını bildiriblər ki, bütün münaqişə bölgələrinin, o cümlədən əzəli Azərbaycan torpağı olan Qarabağın problemi tezliklə beynəlxalq hüquq normaları çərçivəsində sülh yolu ilə öz ədalətli həllini tapacaq.
İnterpress.az
