Aprelin 16-na keçən gecə qoşunların təmas xəttində tapılan meyitin Azərbaycan hərbçisi olduğu təsdiqlənib.
Bu barədə Azərbaycan Müdafiə Nazirliyinin mətbuat xidmətindən bildirilib.
Məlumatda qeyd olunur ki, erməni tərəfinin Azərbaycan Silahlı Qüvvələrinin hərbi qulluqçusunun meyitinin tapılması ilə bağlı verdiyi xəbər təsdiqini tapıb: “Hazırda onun təhvil alınması ilə bağlı müvafiq qurumlarla hazırlıq və əlaqələndirmə işləri aparılır”.
***
AzNews.az xəbər verir ki, bu barədə qondarma Dağlıq Qarabağ rejiminin Müdafiə Nazirliyindən məlumat verilib. Məlumata əsasən, hərbçimizin cəsədi aprelin 16-a keçən gecə təmas xəttində tapılıb.
Xatırladaq ki, bir neçə gün öncə Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyası döyüş meydanında itkin düşənlərlə bağlı axtarışlar aparılan zaman bir hərbi qulluqçumuz – kiçik gizir Baxışov Seymur Qulamhüseyn oğlunun taleyi barədə məlumat əldə edilmədiyini açıqlamışdı. İtkin düşən hərbi qulluqçumuzun erməni tərəfinin əlində olduğu ehtimal edilirdi. Ancaq qarşı tərəf onun barəsində məlumat verməkdən imtina edir və qaytarılması istiqamətində müvafiq addımlar atmırdı.
İnterpress.az
