Oğruların girdiyi evdə sahibədən başqa qulluqçusu və sürücüsü olub. Daxili İşlər Nazirliyinin mətbuat xidmətindən verilən məlumata görə, Salyan rayonunun Qalalı kəndində yaşayan Sevda Soltanovanın evinə oğurluq məqsədi ilə girmiş 3 maskalı şəxs S.Soltanova ilə rastlaşdığından ona və səs-küyə oyanmış evdə olan Elnarə Əhədovaya və Zabil Ağayevə dəmir parçası ilə xəsarət yetirib hadisə yerini tərk ediblər.
Salyan Rayon Polis Şöbəsinin əməkdaşlarının həyata keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən Bakı şəhər sakinləri Camal Namazov, əvvəllər məhkum olunmuş Fərid Rəsulov və Zaur Hüseynov tutulub.
Ətraflarında aparılmış əməliyyat tədbirləri ilə onların iyunun 19-da A.Feyzullayevə məxsus mağazadan oğurluğa cəhd göstərmələri, Ş.Əkbərova məxsus kafedən maqnitofon oğurlamaları da müəyyən edilib.
Evinə basqın edilən qadın vəkillik fəaliyyəti ilə məşğul olur. Hadisədən sonra açıqlama verən Sevda Soltanova bildirib ki, hadisə baş verən vaxt o özü, qulluqçusu Elnarə Əhədova və 22 yaşlı sürücüsü Rabil Ağayev evdə yatıbmışlar:
\”Yuxuda ikən əllərində qara əlcək, üzündə qara maska olan bir şəxs məni boğmağa çalışırdı. Yuxudan ayılıb müqavimət göstərməyə başladım. Bu vaxt yataq otağına soxulmuş digər maskalı şəxs “işini bitir” deyə göstəriş verdi. Bunu eşidən kimi qışqırdım. Səsə mənimlə biri otaqda yatmış qulluqçu Elnarə oyandı və qışqıraraq qonşu otaqda yatmış sürücünü köməyə çağırdı. Sürücü səsə oyanıb otağa daxil olarkən pusquda olan üçüncü maskalı şəxs ona hücum etdi. Əlbəyaxa olduqları zaman digər iki basqınçı məndən əl çəkərək sürücüyə hücum etdi. Ona əllərindəki dəmir linglə baş və ayaq nahiyələrindən zərbələr endirdilər”.
Onu da qeyd edək ki, Sevda Soltanova I qrup əlildir və əlil arabasında gəzir. (ans)
Maskalıların evinə basqın etdiyi qadın vəkil
İnterpress.az
