Aksiya iştirakçılarının virtualaz.org saytına verdiyi məlumata görə, onlar bu gün baş tutan məhkəmə prosesindən çıxaraq birbaşa PA-nın binasının qarşısına gəliblər.
Zərərçəkənlərin sözlərinə görə, onların bir neçə nümayəndəsi PA-da qəbul olunub: “Məhkəmə mənim özümü də zərərçəkən kimi tanımırdı. Sonda nəhayət tanıdı və bu gün məhkəmə prosesi oldu. Proses saat 14:00-a təyin olunmuşdu, amma 14:30-da başladı. Bizi çağırıb bir-bir soruşdular ki, nə qədər pul vermişik və geri almaq istəyirikmi, vəssalam. Biz də elə məhkəmədən çıxan kimi bura toplaşdıq. Nümayəndələrimizi administrasiyada qəbul ediblər”.
Hazırda PA-nın binası qarşısında olan aksiya iştirakçılarından Səxavət Hüseynovun virtualaz.org saytına verdiyi məlumata görə, onların nümayəndələrinin görüşü artıq başa çatıb: “Bizim nümayəndələrə ancaq o deyilib ki, sabah Baş Prokurorluğa gedək. Onsuz da biz özümüz bundan öncə demək olar ki, bütün qurumlara müraciət etmişdik. İndi Baş Prokurorluğa qəbula yazılmağa gedirik. Sabah görüş olacaq”.
Aksiyada 50-dək zərərçəkən iştirak edib.
Interpress.az
