Finlandiya Müdafiə Nazirliyi Rusiyanın hərbi obyektlərə qarşılıqlı səfərlərə dair ikitərəfli sazişi ləğv edəcəyini açıqlayıb.
Bu barədə İnterpress.az xarici mediaya istinadən xəbər verir.
2000-ci ildə imzalanan ikitərəfli müqavilənin Rusiyadan Finlandiyaya illik qiymətləndirmə səfərini və Finlandiyadan Rusiyanın şimal-qərbindəki Leninqrad Hərbi Dairəsinə bənzər səfəri əhatə etdiyi bildirilib.
“Finlandiya bu gün Rusiyadan iki ölkə arasında hərbi qiymətləndirmə səfərlərinə dair ikitərəfli sazişin iyunun 1-dən etibarən ləğv ediləcəyi barədə məlumat alıb”, – məlumatda deyilir.
Finlandiya keçən ay NATO-ya üzv olub. Rusiya bu məsələ ilə bağlı ziddiyyətli açıqlamalar verib, İsveç və Finlandiyanın NATO-ya üzv olmaq üçün müraciət prosesini tənqid edib.
Ən son 2019-cu ildə COVID-19 epidemiyasından əvvəl həyata keçirilən ikitərəfli razılaşma Soyuq Müharibədən sonrakı Şərq-Qərb münasibətlərini yaxşılaşdırmaq üçün görülən bir sıra tədbirlərdən biri idi.
