Bolqarıstan hökuməti ölkənin silah sənayesi obyektləri və sursat anbarları ətrafında təhlükəsizlik tədbirlərini gücləndirib.
Bu barədə İnterpress.az xarici mediaya istinadən xəbər verir.
Bildirilib ki, İqtisadiyyat və Sənaye Nazirliyi, Daxili İşlər Nazirliyi və Yanğından Mühafizə Müdirliyinə dövlət və özəl hərbi sənayenin bütün bölmələrində lazımi tədbirlərin görülməsi tapşırılıb.
Silah sənayesi obyektləri və sursat anbarları ətrafında təhlükəsizlik tədbirlərinin artırıldığı qeyd edilib.
Həyata keçirilən tədbirlər çərçivəsində aidiyyəti qurumlardan qarışıq ekspert qruplarının yaradıldığı, qrupların obyektlərə baş çəkəcəkləri və lazımi koordinasiyanın təmin ediləcəyi vurğulanıb.
İqtisadiyyat və Sənaye naziri Boqdan Boqdanov bu gün Sopot şəhərindəki ölkənin ən böyük silah zavodu VMZ-ni ziyarət edib və tədbirləri araşdırıb.
İyunun 24-də Bolqarıstanın şərqindəki Karnobat şəhərində özəl bir şirkətin silah-sursat anbarında baş verən yanğın müdafiə sənayesində təhlükəsizlik məsələlərini bir daha gündəmə gətirib.
Zərər baş verən anbarda Gürcüstan və Ukraynaya ixrac ediləcək məhsulların olduğu açıqlanıb.
İttiham tərəfi yanğını “təxribat” kimi qiymətləndirib və əvvəlki oxşar hadisələrdə iştirak edən şübhəlilərin Rusiya hərbi kəşfiyyatına işlədiyini iddia edib.
Yanğın Bolqarıstanın Ukraynaya 1 milyon artilleriya mərmisi göndərmək üçün Avropa İttifaqının (Aİ) təşəbbüsünə qoşulacağını elan etməsindən bir gün sonra baş verib.
