Elm adamları Yura dəniz tısbağası Solnhofia Parsonsi adlı qeyri-adi fosili tapıblar.
Bu barədə İnterpress.az xarici mediaya istinadən xəbər verir.
Demək olar ki, tapılan tısbağanın bütün üzvləri və ayaq sümükləri toxunulmaz olaraq qalıb.
Bugünkü dəniz tısbağası növlərinin hamısının okeanın dərinliklərində üzməyə imkan verən uzun və sərt üzgəcləri var.
Yeni təsbit edilən fosilin əzaları isə bədən ölçülərinə görə indiki dəniz tısbağalarından daha qalındır.
Elm adamları iyulun 26-da PLOS One jurnalında bildiriblər ki, bu qısa bədən üzvləri Solnhofia Parsonsi-nin açıq okeanda deyil, sahil sularında üzdüyünü göstərir.
“Bu dəniz tısbağasının qalıqları ilk dəfə 1970-ci illərdə aşkar edilib, lakin yeni nümunə bu növün ən yaxşı qorunub saxlanmış nümunəsidir. O, bütün kəllə sümüyü, onun bütün qabığı, həmçinin dörd tam üzvünü ehtiva edir”, – tədqiqatın əməkdaşı Feliks Augustin bildirib.
S.Parsonsi sağ olanda burnundan quyruğa qədər təxminən 30 santimetr uzunluğunda olub və başı nisbətən böyük (10 santimetr) olub.
Fosil 2014-cü ildə Almaniyanın cənub-şərqində, Yura dövrünün ikinci hissəsinə (199,6 milyon il əvvəldən 145,5 milyon il əvvəl) aid fosillərlə zəngin ərazidə yerləşən əhəngdaşı karxanasından çıxarılıb.
Araşdırmalara görə, burada çoxlu tısbağalar, eləcə də balıqlar, timsahlar və hətta plesiozavrlar və ixtiozavrlar kimi dəniz sürünən nəhəngləri qorunur.
Ərazi 1950-ci illərdən aktiv şəkildə mədən kimi istifadə olunur, lakin burada yalnız təxminən 20 il əvvəl fosil qazıntılarına başlanılıb.
