Avropa İttifaqı (Aİ) HƏMAS-ın İsrailə hücumlarından sonra yayılan dezinformasiya, qeyri-qanuni və zərərli məzmuna görə sosial media platforması “X”in Aİ-nin onlayn qaydalarına uyğunluğu ilə bağlı araşdırmaya başlayıb.
Bu barədə İnterpress.az xarici mediaya istinadən xəbər verir.
Aİ Komissiyası Rəqəmsal Xidmətlər Qanunu (DSA) çərçivəsində əvvəllər Twitter kimi tanınan X platformasına rəsmi məlumat sorğusu göndərildiyini açıqlayıb.
Tələbin qanunsuz məzmun və dezinformasiya, xüsusilə terrorizm, zorakılıq xarakterli nəşrlər və nifrət nitqinin yayılması ilə bağlı Komissiyaya daxil olan iddialardan sonra edildiyi vurğulanıb.
Aİ-nin avqust ayında qüvvəyə minən yeni rəqəmsal qaydaları çərçivəsində “X”in “çox böyük onlayn platforma” kimi təsnif edildiyi xatırladaraq, onun qeyri-qanuni məzmunun yayılması və qarşısının alınması kimi müxtəlif yeni qaydalara əməl etməsi lazım olduğu bildirilib.
“Komissiya “X”in Rəqəmsal Xidmətlər Qanununa (DSA) uyğunluğunu araşdırır, o cümlədən qeyri-qanuni məzmunun bildirilməsi, şikayətlərə baxılması, risklərin qiymətləndirilməsi və müəyyən edilmiş risklərin azaldılması tədbirləri ilə bağlı siyasət və təcrübələri”, – deyə məlumatda deyilir.
Avqust ayında qüvvəyə minən Aİ qanunu əsas rəqəmsal platformalarda sərt qaydalar tətbiq edib.
Aİ qaydaları pozan rəqəmsal platformalara qlobal dövriyyəsinin 6 faizinə qədər cərimə tətbiq edə bilər. Təkrar pozuntular halında, Aİ-də sözügedən rəqəmsal platformaların fəaliyyətinə xitam verilə bilər. HƏMAS-ın silahlı qanadı İzzəddin əl-Qəssam Briqadaları tərəfindən İsrailə hücumun ardından Aİ Komissiyası qanunsuz məzmun və şiddət ehtiva edən dezinformasiyanın yayıldığını təsbit edib.
Aİ daha sonra Meta və TikTok-a oxşar xəbərdarlıq edib.
