Dövlət Gömrük Komitəsinin Mətbuat Xidmətindən verilən məlumata görə, Bakı-İstanbul aviareysi ilə getmək üçün Heydər Əliyev Beynəlxalq Aeroportuna gələn Türkiyə Respublikası vətəndaşının əl çantasına rentgen aparatı ilə baxış keçirilən zaman gömrükçülər monitorda zərgərlik məmulatlarına bənzər təsvirlər müşahidə edib.
Yoxlama zamanı çantanın içərisindəki şəxsi əşyaların arasından gömrük nəzarətinə təqdim olunmayan, şifahi, elektron və kağız üzərində yazılı formada bəyan edilməyən, bəzilərinin üzərində qaşlar olan 8 cüt sırğa, 9 ədəd üzük, 3 ədəd boyunbağı, 1 ədəd qolbaq aşkar olunub.
Bundan sonra sərnişinin üzərində şəxsi yoxlama aparılıb və onun alt paltarının içindən gömrük nəzarətindən gizlədilən 100 ədəd hər biri 500 avro nominalında pul əskinasları olmaqla, cəmi 50000 avro aşkar olunaraq protokol əsasında götürülüb.
Ədliyyə Nazirliyinin Məhkəmə Ekspertizası Mərkəzinin ekspert arayışına əsasən, aşkar edilən məmulatların metalı 750 əyarlı qızıl, ümumi çəkisi 415,44 qram, qaşları isə brilyantdır.
Faktla bağlı DGK-nin İstintaq İdarəsində araşdırma aparılır. (apa.az)
İnterpress.az
