Misirdə minik avtomobili ilə toqquşan iki bayker partlayış nəticəsində yanaraq ölüb.
İnterpress.az xəbər verir ki, bu barədə “Ahram Online” nəşri məlumat yayıb.
Misirdə sürət həvəskarı olan iki motosikletçinin təhlükəli yarışı faciəvi sonluqla bitib. Yüksək sürətlə hərəkət edən baykerlərin qarşısına qəfildən minik avtomobili çıxıb.
Nəticədə qaçılmaz olan olduqca ağır və şiddətli toqquşma baş verib. Toqquşmanın təsirindən motosikletlərin yanacaq çəni partlayıb və hadisə yerində dərhal böyük yanğın yaranıb.
Sürət həvəskarlarının sağ qalmaq şansı olmayıb – hər iki bayker aldığı bədən xəsarətləri və yanıqlar səbəbindən hadisə yerindəcə faciəvi şəkildə həyatını itirib.
Hadisə anı yaxınlıqdakı müşahidə kameraları tərəfindən anbaan qeydə alınıb. Görüntülərdə motosikletçilərin sürət həddini kəskin şəkildə aşaraq digər hərəkət iştirakçıları üçün də ölümcül təhlükə yaratdıqları aydın görünür.
Faktla bağlı Misir hüquq-mühafizə orqanları tərəfindən genişmiqyaslı təhqiqat başladılıb, toqquşmaya səbəb olan minik avtomobilinin sürücüsü dindirilmə məqsədilə saxlanılıb.
Yol polisi rəsmiləri gəncləri yollarda bu cür təhlükəli yarışlar təşkil etməməyə və sürət həddinə ciddi əməl etməyə çağırırlar.
Xuraman Etibarlı
İnterpress.az
