Venesuelada 7,1 maqnitudalı dəhşətli zəlzələ olub, paytaxt Karakasda binalar zədələnib.
İnterpress.az xəbər verir ki, bu barədə Avropa-Aralıq dənizi Seysmoloji Mərkəzi (EMSC) məlumat yayıb.
Venesuelada 7,1 maqnitudalı olduqca güclü və şiddətli zəlzələ baş verib. Yeraltı təkanlar ölkənin paytaxtı Karakasda və ətraf ştatlarda kəskin şəkildə hiss edilib. Seysmoloqların bildirdiyinə görə, zəlzələnin episentri dəniz sahilinə yaxın ərazidə qeydə alınıb.
Təkanların gücündən Karakasda bir çox hündürmərtəbəli binaların divarlarında çatlar yaranıb, bəzi tikililərin fasad hissələri isə qoparaq tökülüb.
Hadisədən dərhal sonra paytaxtda güclü panika başlayıb, minlərlə insan qorxu içində binaları tərk edərək küçələrə və açıq meydanlara axışıb.
Şəhərin bir neçə rayonunda elektrik enerjisinin verilişi kəsilib və mobil rabitə sistemində ciddi fasilələr yaranıb.
Hazırda mülki müdafiə qüvvələri və xilasetmə briqadaları zədələnmiş binalarda təhqiqat aparır, dağıntıların miqyası və mümkün xəsarət alanlar barədə məlumatları dəqiqləşdirirlər.
Yerli hakimiyyət orqanları əhalini ehtiyatlı olmağa və təkrar təkanlar (afterşoklar) ehtimalına qarşı ayıq-sayıq davranmağa çağırıb.
Xuraman Etibarlı
İnterpress.az
