Ermənistanın Gümrü şəhərində Ağsaqqallar Şurasının üzvü Karen Simonyanın evində axtarışlar aparılır.
İnterpress.az xəbər verir ki, bu barədə “Sputnik Ermənistan” məlumat yayıb.
Ermənistanın Gümrü şəhərində Ağsaqqallar Şurasının (şəhər şurasının) müxalif üzvü Karen Simonyanın mənzilində hüquq-mühafizə orqanları tərəfindən genişmiqyaslı axtarışlar həyata keçirilir.
Ermənistanın Antikorrupsiya Məhkəməsindən verilən məlumata görə, bu axtarışlar müxalif “Ermənistan” bloku tərəfdarlarının son parlament seçkilərində seçicilərin səslərini satın almaq (rüşvət vermək) ittihamı ilə başlanmış cinayət işi çərçivəsində aparılır.
Axtarışlar zamanı mənzildən mühüm sənədlərin və rəqəmsal məlumat daşıyıcılarının götürüldüyü bildirilir. İstintaq orqanları Karen Simonyanın seçki prosesindəki qanunsuz maliyyə əməliyyatlarında və səslərin pulla satın alınmasında iştirakını araşdırırlar.
Xatırladaq ki, iyunun 7-də Ermənistanda keçirilən parlament seçkiləri ilə bağlı son günlərdə müxalif namizədlərə və fəallara qarşı genişmiqyaslı həbs və təqib dalğası başlayıb. Bundan əvvəl “Ermənistan” və “Güclü Ermənistan” bloklarının bir neçə deputatlığa namizədi rəsmi olaraq həbs edilib və ya ev dustaqlığına buraxılıb.
Ermənistan Mərkəzi Seçki Komissiyası prokurorluğa bu siyasətçilərə qarşı cinayət təqibinə başlamaq üçün icazə verib. Müxalifət isə bu hərəkətlərin hamısının hakimiyyət tərəfindən idarə olunan siyasi təzyiq kampaniyası olduğunu iddia edir.
Xuraman Etibarlı
İnterpress.az
