Finlandiya Rusiyanı bu ölkəyə qeyri-qanuni mühacirləri zorla göndərməkdə ittiham edib. Bu barədə İnterpress.az yerli mediaya istinadən xəbər verir. Finlandiyanın cənub-şərq sərhəd zastavasının rəisi Jouko Kinnuen yerli mətbuata açıqlamasında bildirib ki, Rusiya hakimiyyəti fəal və sistemli şəkildə sərhəd bölgəsinə qeyri-qanuni mühacirləri gətirir və onları Finlandiyaya keçməyə məcbur edir.
Rus səlahiyyətlilərin sərhəd qapılarını açaraq insanları Finlandiya tərəfinə itələdiyini, daha sonra isə sərhəd qapılarını bağladığını, bu insanların geri qayıtmasını qeyri-mümkün etdiyini ifadə edən Kinnunen bir çox mühacirin öz iradələri olmadan Finlandiyaya keçmək məcburiyyətində qaldıqlarını ifadə edib.
Finlandiya noyabrın 16-da sərhəd bölgəsinə qeyri-qanuni immiqrantları gətirdiklərini əsas gətirərək Rusiya ilə dörd sərhəd qapısını bağlayacağını açıqlayıb. Bunun üzərinə minlərlə immiqrant sərhəd bölgəsində gözləməyə başlayıb.
