İtaliyanın cənub bölgələrində bir çox məntəqələrdə baş verən meşə yanğınlarının birbaşa və dolayı təsiri nəticəsində 4 nəfərin həyatını itirdiyi açıqlanıb.
Bu barədə İnterpress.az xarici mediaya istinadən xəbər verir.
Ölkənin cənub rayonlarında baş verən meşə yanğınları gündəlik həyata mənfi təsir göstərir.
Yanğınların ən çox zərər çəkdiyi yer olan Siciliya adasında irili-xırdalı 86 yanğınla mübarizə aparılır.
Adadakı Palermo hava limanı ətrafında dünən başlayan yanğın gecə saatlarında geniş əraziyə yayılıb.
Yanğın yerində yanan iki cəsəd tapılıb.
Yanğın səbəbindən gecə saatlarında hava nəqliyyatına bağlanan Palermo hava limanı günorta saatlarında məhdud uçuşlar üçün yenidən açılıb.
Bundan əlavə, Palermo hava limanı yaxınlığında baş verən yanğınla əlaqədar ərazidən təxminən 1500 nəfər təxliyə edilib.
Palermo şəhərinə qədər uzanan alov səbəbiylə Cervello Xəstəxanası tüstülər altında qalıb, xəstəxananın bir hissəsində olan 200-ə yaxın adam təxliyə edilib.
Adadakı qədim yunan dövrünə aid Segesta arxeoloji parkı da alovlara qərq olub.
Qurudan və havadan yanğınla mübarizə tədbirlərinin davam etdiyi Siciliyada yanğınlara müdaxilə edən 1 meşə işçisi və 2 yanğınsöndürən yaralanıb.
Siciliya Regional Hökumətinin sədri Renato Schifani də Romadakı mərkəzi hökumətdən adaya təsir edən yanğınların vurduğu ziyanla mübarizə aparmaq üçün fövqəladə vəziyyət elan etməsini tələb etdiyini mediaya əks etdirib.
Yanğınların davam etdiyi başqa bir bölgə olan Kalabriyanın Kardeto qəsəbəsində 98 yaşlı yataq xəstəsi evinin yaxınlığında baş verən yanğında həyatını itirib.
Bundan əlavə, yüksək hərarəti olan 88 yaşlı qadın tibb qrupları yanğınlardan ona çata bilmədiyi üçün dünyasını dəyişib.
Beləliklə, yanğınların birbaşa və dolayı təsiri nəticəsində ölənlərin sayı 4-ə yüksəlib.
Hazırda Kalabriya bölgəsində irili-xırdalı 80-ə yaxın yanğın var.
Ölkənin cənub-şərqindəki Puglia bölgəsində, Adriatik sahillərindəki Vieste şəhəri yaxınlığında baş verən meşə yanğını səbəbilə 3 oteldən 2 minə yaxın turist bölgədən təxliyə edilib.
Cənub rayonlarında yanğınsöndürmə işləri davam edərkən, yüksək temperatur və külək bu işləri çətinləşdirir.
Ölkənin şimalındakı Lombardiya və Veneto bölgələri güclü dolu və fırtınalı hava şəraiti ilə mübarizə aparır.
Lombardiya Regional Hökuməti indiyə qədər çoxlu ağacları və yol nişanlarını məhv edən, bina və nəqliyyat vasitələrinə ziyan vuran, iki nəfərin ölümünə səbəb olan fırtına səbəbiylə mərkəzi hökumətdən fövqəladə vəziyyət elan etməsini tələb etməyə hazırlaşır.
Lombardiya Bölgəsinin paytaxtı Milanda şiddətli fırtına səbəbiylə yıxılan ağaclar şəhər mərkəzindəki bəzi yolları nəqliyyata bağlayıb, bəzi küçələri isə yağışlar səbəbindən su basıb.
Veneto bölgəsində şiddətli fırtınada elektrik şəbəkəsinin zədələndiyi və 8 min insanın elektrik enerjisi ilə təmin oluna bilmədiyi mətbuatda əksini tapıb.
